საქართველოს სამოციქულო ავტოკეფალურ მართლმადიდებელ ეკლესიას სახელმწიფო საკუთრებაში არსებული 5 000 კილოგრამი გასროლილი თითბრის ჰილზები საკუთრებაში უსასყიდლოდ გადაეცემა.
ამის შესახებ საქართველოს მთავრობის განკარგულებაშია აღნიშნული.
როგორც დოკუმენტშია ნათქვამი, სახელმწიფო ქონების ეროვნულმა სააგენტომ, ამ განკარგულების შესრულების მიზნით, უზრუნველყოს კანონმდებლობით გათვალისწინებული ღონისძიების განხორციელება.
„ლიბერალი“ ამ დრომდე ცდილობდა საპატრიაქროსთან დაკაშირებას, იმის გასარკვევად, თუ რისთვის სჭირდებათ მათ 5 000 კილოგრამი გასროლილი თითბრის ჰილზები.
საპატრიაქროს საზოგადოებასთან ურთიერთობის სამსახურმა ამ საკითხზე საპასუხოდ საზოგადოება „ივერიისასთან" გადაგვამისამართა, რომელიც მახათას მთაზე ტაძრის მშენებლობას ხელმძღვანელობს.
ორგანიზაციაში განმარტავენ, რომ გასროლილი თითბრის ჰილზები მახათის მთაზე ტაძრის გალავნისა და ჭიშკრისთვის იყო გათვალისწინებული. თუმცა ორგანიზაციამ იმსჯელა და გადაწყვიტა, რომ უარი ეთქვა სახელწმიფოს შეთავაზებაზე და აღარ გამოეყენებინა ამ ტიპის ჯართი ტაძრის ჭიშკრისთვის.
როგორც „ლიბერალს“ ორგანიზაციაში უთხრეს, ყველამ იცის რომ თითბრის მასალა, რომელიც ადვილად მუშავდება და თან ლამაზია, სხვადასხვა მიზნისთვის გამოიყენება, მას ასევე იყენებს ეკლესია, ამიტომ სახელმწიფოსგან მიიღეს შეთავაზება, რომ ეს გასროლილი მასრები მათ არაფერში სჭირდებათ და ხომ არ გამოიყენებდა ეკლესია ნაკეთობების ან სხვა საჭიროებისთვის.
„სახელმწიფოსგან შემოთავაზები იყო, თუ რამეში გამოვიყენებდით გადმოეცათ უსასყიდლოდ. საზოგადოება „ივერიისამ“ გადაწყვიტა, რომ ეს იყო გასროლილი თითბირის ჰილზები და არ გამოეყენებინათ. ვიყიდით სხვა ჯართს, თითბრის ფირფიტის სახით იქნება თუ სხვა და იმისგან გაკეთდება", - ამბობენ ორგანიზაციაში.
მათივე განმარტებით გადაწყვეტილება ერთი კვირის წინ მიიღეს და მედიის მიერ ინფორმაციის გავრცელებას ამასთან კავშირი არ აქვს.
საზოგადოება „ივერიისა“, როგორც ორგანიზაციაში ამბობენ, ადრე ტაძრის მშენებლობის ფონდი იყო და მახათის მთაზე ტაძრის მშენებლობას პაატა ბურჭულაძე ხელმძღვანელობდა. თუმცა ახლა ტაძრის მშენებლობას „ივერიისა“ ხელმძღვანელობს და მისი გენერალური დირექტორი გიორგი თავაძეა.
