გუშინ, 1 ოქტომბერს გერმანიაში ერთნაირსქესიანთა ქორწინება ლეგალური გახდა. BBC-ის ცნობით, სწორედ ამ დღეს კარლ კრეილემ და ბოდო მენდემ ბერლინში იქორწინეს - მიღებული კანონით გერმანიაში პირველად მათ ისარგებლეს. 
დასვენების დღის მიუხედავად, გერმანიის ქალაქებში უჩვეულოდ იყო გახსნილი რეესტრის ოფისები, რათა წყვილებს საშუალება მისცემოდათ დაქორწინებულიყვნენ კანონის ამოქმედების პირველივე დღეს. 
ქორწინება ერთნაირი სქესის მქონე წყვილებს მისცემს საგადასახადო შეღავათებსა და შვილად აყვანის უფლებას, ანუ იმავე უფლებებს, რაც ჰეტეროსექსუალ წყვილებს აქვთ. 
გერმანიაში 2001 წლიდან ერთნაირსქესიან წყვილებს საშუალება ჰქონდათ, სამოქალაქო პარტნიორობით ესარგებლათ, თუმცა კანონი წყვილებს ისეთივე სტატუსს არ ანიჭებდა, როგორსაც ქორწინება. 
გერმანიის პარლამენტმა ქორწინების თანასწორობას მხარი ივნისში დაუჭირა.