ე.წ. ციანიდის საქმეზე თბილისის საქალაქო სასამართლოს განაჩენი ადვოკატებმა თბილისის სააპელაციო სასამართლოში გაასაჩივრეს. როგორც ადვოკატმა, გიორგი ფანცულაიამ ჟურნალისტებს განუცხადა, ყველა მოწმის ჩვენება და მტკიცებულება ადასტურებს, რომ მოსამართლე ბესიკ ბუგიანიშვილის განაჩენი უსაფუძვლოა. 

„ყველამ ნახა, თუ როგორ მიდიოდა სასამართლო პროცესები. ყველა მოწმის დაკითხვა, ყველა მტკიცებულება აბსოლუტურად ადასტურებს, რომ დეკანოზის მიმართ წარდგენილი განაჩენი უსაფუძვლოა. იმავე ანგარების ბრალდებასთან დაკავშირებით, ბესიკ ბუგიანიშვილის გადაწყვეტილებაში აბსურდთან ერთად ლოგიკასაც ვეღარ ვხედავთ. ბესიკ ბუგიანიშვილი ამბობს, რომ ოდესღაც განხორციელებული თანამდებობრივი გადაადგილება გიორგი მამალაძეს თურმე გაახსენდა წელიწად-ნახევრის შემდეგ და ამის გამო შურისძიებით გეგმავდა მკვლელობას. ეს არის აბსურდი. იმედი გვაქვს, რომ სააპელაციო სასამართლოს სამ მოსამართლეს შორის ორი მაინც არ აღმოჩნდება ბესიკ ბუგიანიშვილი და თავიდან ბოლომდე ის იქნება გამართლებული" , - განაცხადა ფანცულაიამ.

დეკანოზი სასამართლომ 5 სექტემბერს დამნაშავედ ცნო და 9 წლით თავისუფლების აღკვეთა შეუფარდა.