ესპანეთის საკონსტიტუციო სასამართლომ დააკმაყოფილა კატალონიის სოციალისტური პარტიის სარჩელი და რეგიონს ორშაბათს დაგეგმილი საპარლამენტო სესიის გამართვა აუკრძალა. სოციალისტური პარტია ეწინააღმდეგება ესპანეთიდან გამოყოფას. ამის გამო, პარტიის დეპუტატები მოითხოვდნენ იმ სესიის აკრძალვას, სადაც პარლამენტი დამოუკიდებლობას გამოაცხადებდა. საკონტიტუციო სასამართლომ დააკმაყოფილა პარტიის სარჩელი და განაცხადა, რომ ასეთი სესია დაარღვევდა დეპუტატების უფლებებს. BBC-ის ინფორმაციით, ამ გზით ესპანეთი ცდილობს, ჩაშალოს ავტონომიური რეგიონის მიერ დამოუკიდებლობის შესაძლო გამოცხადება.
კატალონიის პრეზიდენტმა, კარლეს პუჩდემონმა 3 ოქტომბერს განაცხადა, რომ კატალონია დამოუკიდებლობას კვირის ბოლოს ან მომავალი კვირის დასაწყისში გამოაცხადებდა. კატალონიის მიერ ესპანეთიდან გამოყოფის მცდელობას ეწინააღმდეგება ცენტრალური ხელისუფლება. ესპანეთის პრემიერ-მინისტრმა, მარიო რახოიმ გააფრთხილა რეგიონის მთავრობა, რომ დამოუკიდებლობის მოპოვების მცდელობა უშედეგო იქნება. რეფერენდუმი დაგმო ესპანეთის მეფე ფილიპე VI-მაც და ქვეყნის მოსახლეობას ერთიანობისკენ მოუწოდა.
ესპანეთის ცენტრალური ხელისუფლების ზეწოლის მიუხედავად, კატალონიაში დამოუკიდებლობის მოთხოვნით 1 ოქტომბერს რეფერნდუმი მაინც გაიმართა. მასში მონაწილეობდა მოსახლეობის 42%, რომელთაგან 90%-მა დამოუკიდებლობას დაუჭირა მხარი. რეფერენდუმის პარალელურად მადრიდის პოლიციასთან შეტაკებების შედეგად 900-მდე ადამიანი დაშავდა, 3 ოქტომბერს კი ადგილობრივმა პროფკავშირებმა კატალონიის მოსახლეობას საყოველთაო გაფიცვისკენ მოუწოდეს.