2018 წლის 1 იანვრიდან გადახდისუნარიანობას კარგავს 50 თეთრის ნომინალის ძველი მონეტა. სავაჭრო და ნაღდი ფულით მომსახურების ობიექტებს აღარ ექნებათ მათი მიღების ვალდებულება. ერთი წლის განმავლობაში ძველი 50 თეთრიანის გამოცვლა შესაძლებელი იქნება ნებისმიერ კომერციულ ბანკსა და საქართველოს ეროვნული ბანკში, ხოლო 2019 წლის 1 იანვრიდან - მხოლოდ საქართველოს ეროვნულ ბანკში.

ე.წ. ოქროსფერი 50-თეთრიანის მოხმარება 1995 წელს დაიწყო. მონეტის ავერსზე დატანილია - გრიფონის რელიეფური გამოსახულება, მის ქვეშ ციფრი „50“ და წარწერა – „თეთრი“, რევერსზე - ბორჯღალი, ციფრები და წარწერები: „საქართველოს რესპუბლიკა“, „REPUBLIC OF GEORGIA". 2006 წლიდან საქართველოს ეროვნულმა ბანკმა მიმოქცევაში 50 თეთრის ნომინალის ახალი მონეტა გაუშვა და ძველი ოქროსფერი 50-თეთრიანი მონეტების ამოღება დაიწყო.