ჰოლანდიის უმაღლეს ჩემპიონატში გასულ კვირას ყველა გუნდის კაპიტანმა ლგბტ დროშის სამკლავური მოირგო. მათ შორის იყო არნემის „ვიტესის“ ქართველი კაპიტანი გურამ კაშია. ჰოლანდიის პროფესიონალ ფეხბურთელთა გაერთიანების ხელმძღვანელის, დენი ჰესპის ინიციატივით, ეს იყო მრავალფეროვნებისა და ტოლერანტობისთვის მიძღვნილი კამპანია.

ჰესპის თქმით, ბევრი ფეხბურთელი, მწვრთნელი, მსაჯი თუ მხარდამჭერი აწყდება უამრავ ბარიერს თავისი იდენტობის გამო. ამის გამო, ის 2013 წლიდან ცდილობს, გაზარდოს მგრძნობელობა და ტოლერანტობა განსხვავებული სექსუალური იდენტობის მქონე პირების მიმართ. „ფეხბურთი უნდა იყოს ყველასი, განურჩევლად კანის ფერის, რასის, სექსუალური იდენტობისა თუ რელიგიისა. ყველას უნდა შეეძლოს, ჩაერთოს თავის საყვარელ სპორტში, წარმომავლობისა და იდენტობის მიუხედავად.“ - ნათქვამია დენი ჰესპის განცხადებაში.