„მე სიახლე მაქვს. სახელმწიფო საიმიგრაციო სამსახურმა მიხეილ სააკაშვილს ლტოლვილის სტატუსზე უარი უთხრა. ამის შემდეგ ის აპატრიდია (მოქალაქეობის არ მქონე პირი). უკვე ყველა იმ გარემოების გარეშე, რაც შეუძლებელს ხდიდა მის დეპორტაციას“, - თქვა ლუცენკომ.

გენერალურმა პროკურორმა დაამატა, რომ სააკაშვილის შესახებ გადაწყვეტილება სასამართლოს ჯერ არ გამოუტანია. ოდესის ყოფილ გუბერნატორსა და საქართველოს ექსპრეზიდენტს უკრაინის სასამართლოში საზღვრის უკანონო გადაკვეთისთვის უჩივიან.

მიხეილ სააკაშვილმა განაცხადა, რომ ლუცენკო დეზინფორმაციას ავრცელებს და მას უარის დამადასტურებელი ოფიციალური დოკუმენტი არ მიუღია. ხოლო, სანამ თავშესაფრის მოთხოვნაზე განცხადება განხილვის პროცესშია, მისი ექსტრადირება ვერ მოხდება. სააკაშვილმა უკრაინას ლტოლვილის სტატუსის მინიჭებაზე სექტემბერში მიმართა. 15 ოქტომბერს „ინტერფაქს - უკრაინასთან“ ინტერვიუში კი თქვა, რომ ზუსტად იცის, გეგმავენ მის დაჭერას, დეპორტაციას ან უფრო მეტიც - მოკვლასაც კი. „მაგრამ ეს პრობლემა არაა, მე არ მეშინია!“ - განაცხადა სააკაშვილმა. 

მიხეილ სააკაშვილმა უკრაინის მოქალაქეობის დაკარგვის მიუხედავად, სექტემბერში სახელმწიფო საზღვარი მაინც გადალახა და ახლა კიევში მიმდინარე საპროტესტო აქციების ერთ-ერთი ორგანიზატორია.