თბილისის სააპელაციო სასამართლომ სპორტის სასახლის მიმდებარე ტერიტორიაზე მრავალბინიანი კორპუსის მშენებლობაზე გაცემული სამშენებლო ნებართვა ბათილად ცნო. არქიტექტურის სამსახურის მიერ გაცემული მშენებლობის ნებართვა შპს „ჰიო დეველოპმენტს“ ჰქონდა მიღებული.
სასამართლოში სამეზობლოს ინტერესებს იურიდიული კომპანია „ქართული სამართლის ჯგუფი“ იცავდა.
როგორც „ლიბერალთან“ საუბრისას კომპანიის იურისტი ლაშა მჭედლიძე ამბობს, სასამართლოში მათი ძირითადი არგუმენტაცია იყო, რომ ამ კონკრეტულ ტერიტორიაზე დამატებითი მრავალბინიანი კორპუსის ჩადგმა ყოვლად გაუსაძლისს გახდიდა ისედაც ურთულეს საყოფაცხოვრებო პირობებს, რომელიც გამოიხატება პირველ რიგში პარკირების პრობლემით, მუდმივი საცობით და ა.შ.
„ჩვენ ვიცავდით მეზობლების ინტერესებს, ცხვირწინ უშენებდნენ კორპუსს, უბნელებდნენ ფანჯრებს, ამით უძრავი ქონების ღირებულებაც იკლებდა. მეზობლებს მიაჩნდათ, რომ მათი ინტერესები ზიანდებოდა, რადგან კრიტიკულ ზღვარზეა ამ ტერიტორიაზე განაშენიანება, ამ ადგილას ფიზიკურად რესურსი აღარ არსებობს ახალი კორპუსის აშენების, მაგრამ მაინც იყო გაცემული ნებართვა“, - აცხადებს მჭედლიძე.
აღნიშნული კორპუსის მშენებლობა მენაშენეს დაწყებული არ ჰქონდა, ის კორპუსის აშენებას ალმასიანის N 31, ბერბუკის N10-ში გეგმავდა. მშენებლობის ნებართვის გაუქმების შემდეგ საქმე უკან დაუბრუნდება არქიტექტურის სამსახურს და მათ სასამართლოს გადაწყვეტილებით დადგენილი გარემოებების გათვალისწინება მოუწევთ.
ფოტომონტაჟი:
