გარემოს დაცვისა და ბუნებრივი რესურსების კომიტეტის ინიციატივით, „ადმინისტრაციულ სამართალდარღვევათა კოდექსში" ცვლილებები უნდა შევიდეს. ინიცირებული კანონპროექტის მიხედვით, მიწისზედა ელექტროტრანსპორტით (მათ შორის, ტროლეიბუსი, ტრამვაი) უბილეთოდ მგზავრობა 20 ლარით დაჯარიმებას გამოიწვევს. მოქმედი რეგულაციით, ავტობუსით უბილეთოდ მგზავრობა 5 ლარით ჯარიმდება.

კანონპროექტის მიხედვით,  მგზავრობისას მგზავრი ვალდებულია, მგზავრობის დასაწყისიდანვე შეიძინოს ბილეთი ან ელექტრონულად გადაიხადოს მგზავრობის ტარიფით განსაზღვრული თანხა.

კანონპროექტის ავტორების თქმით, დედაქალაქში ევროსტანდარტების შესატყვისი ადგილობრივი საქალაქო რეგულარული სამგზავრო გადაყვანის M3 კატეგორიის ახალი ავტობუსების შემოყვანის პროცესის დაწყებას (ამჟამად მოქმედი მგზავრობის ბილეთის აღების პრინციპის პარალელურად) მოჰყვა ახალი სისტემის დანერგვა - ელექტრონული გადახდის საშუალებით მგზავრობის საფასურის გადახდა. შესაბამისად, ცვლილების მიზანია სამგზავრო ბილეთებით დანაგვიანების მავნე პრაქტიკის აღმოფხვრა და  ბილეთის ქაღალდზე გაწეულ/გასაწევ ხარჯს შემცირება. 

კანონპროექტით, საურავის ოდენობა მცირდება. იმ შემთხვევაში, თუ მგზავრი 30 დღის განმავლობაში არ გადაიხდის ჯარიმას, მას 50 ლარის ნაცვლად 40 ლარის გადახდა მოუწევს.