საქართველოს ფინანსთა სამინისტროს საგამოძიებო სამსახურის თანამშრომლებმა ყალბი დოკუმენტების დამზადება-გასაღების ფაქტზე ერთ-ერთი ყოფილი კომერციული სასწავლო დაწესებულების ხელმძღვანელი დააკავეს.
გამოძიებით დადგინდა, რომ ბრალდებულმა, სხვა პირებთან ერთად, დაამზადა და გაასაღა სამართალმცოდნეობის ბაკალავრის ხარისხის დამადასტურებელი ყალბი დიპლომი და სრული ზოგადი განათლების ატესტატი. სანაცვლოდ კი ბრალდებულმა ერთ-ერთი მოქალაქისგან 1000 აშშ დოლარი და 3 000 ლარი აიღო.
უწყების ცნობით, საქმეზე გამოძიება საქართველოს სისხლის სამართლის კოდექსის 362-ე მუხლის მეორე ნაწილით მიმდინარეობს , რაც სასჯელის სახით თავისუფლების 3-დან 6 წლამდე ვადით აღკვეთას ითვალისწინებს. დანაშაულში მონაწილე სხვა პირების დადგენა-მხილების მიზნით კი ტარდება შესაბამისი ღონისძიებები.
