„სამართლიანი არჩევნებისა და დემოკრატიის საერთაშორისო საგოზადოებამ“ ადგილობრივი თვითმმართველობის მეორე ტურის წინასაარჩევნო პროცესის დაკვირვების შედეგები გამოაქვეყნა. არასამთავრობო ორგანიზაციის განცხადებით, ოზურგეთის ოლქში ზეწოლა-მუქარის 4 და ამომრჩევლის სავარაუდო მოსყიდვის 1 ფაქტი გამოვლინდა. თითქმის ყველა შემთხვევაში ოზურგეთის მუნიციპალიტეტის საჯარო მოხელეები „ქართული ოცნების“ მერობის კანდიდატის - ბეგლარ სიორიძის სასარგებლოდ მოქმედებდნენ. „ადგილობრივი თვითმმართველობის არჩევნების პირველ და მეორე ტურებს შორის პერიოდი ოზურგეთში პოლიტიკური ნიშნით მუქარა-ზეწოლისა და ადმინისტრაციული რესურსის გამოყენების ფონზე მიმდინარეობს, რაც ხელს უშლის თანასწორ და თავისუფალ წინასაარჩევნო გარემოს“, - წერს ISFED.

ISFED-მა მოუწოდა ხელისუფლებას და მერობის კანდიდატებს, თავი შეიკავონ ზეწოლისა და მოსყიდვისგან. „აღნიშნული ფაქტებისა და პირველ ტურზე გამოვლენილი ტენდენციების გათვალისწინებით, „სამართლიანი არჩევნები“ მოუწოდებს ადგილობრივ თვითმმართველობას, პოლიტიკურ პარტიებსა და კანიდატებს - არჩევნების დღეს თავი შეიკავონ ამომრჩევლის მოსყიდვისა თუ ზეწოლისგან, ასევე ნებისმიერი ისეთი ქმედებისგან, რომელიც შესაძლოა აღქმული იქნას ამომრჩევლის ნების კონტროლად, მათ შორის არჩევნებზე მოსული ამომრჩევლების მონაცემების შეგროვებისგან. „სამართლიანი არჩევნები“ ასევე მოუწოდებს საარჩევნო ადმინისტრაციას - უზრუნველყოს ამომრჩევლის პირადი მონაცემების დაცვა და ამომრჩევლის ნების თავისუფალი გამოხატვა“, - წერია „სამართლიანი არჩევნების“ მიერ გავრცელებულ განცხადებაში.