პრემიერ-მინისტრი განათლების ყოფილ მინისტრ ალექსანდრე ჯეჯელავას დიპლომატიურ სამსახურში გადასვლას სთავაზობს. გიორგი კვირიკაშვილმა ამ შეთევაზებაზე მინისტრთა კაბინეტის ორ ახალ წევრთან შეხვედრისას განაცხადა.
„ვსაუბრობთ სანდროსთან - შესაძლოა, ის დიპლომატიურ სამსახურში წავიდეს, თუმცა როგორც ვესაუბრე, მას გული უფრო ისევ განათლების სფეროში პედაგოგიური მიმართულებით ბიზნესსაქმიანობისკენ მიუწევს და ვნახოთ, რა გადაწყვეტილებას მიიღებს. ის ჩვენი გუნდის წევრი არის და ძალიან ღირსეული ადამიანია“, - განაცხადა პრემიერმა მამუკა ბახტაძესთან და მიხეილ ჩხენკელთან შეხვედრისას.
ალექსანდრე ჯეჯელავა განათლებისა და მეცნიერების მინისტრის პოსტს დაგეგმილი სამთავრობო ცვლილებების შემდეგ დატოვებს. პრემიერის თქმით, ახლა ჯეჯელავაზეა დამოკიდებული, გააგრძელებს თუ არა ის საქმიანობას დიპლომატიურ სამსახურში.