თბილისის მერმა, კახა კალაძემ ჟურნალისტებთან თბილისის მერის უსაფრთხოების სამსახურის პოსტზე წარდგენილ კანდიდატ ნუგზარ ჭონქაძეზე ისაუბრა. მისი თქმით, თუ ჭონქაძეს არ მოსწონს გარკვეული ორიენტაციის ადამიანები, ეს მისი ნებაა. კალაძე აღნიშნავს, რომ ჭონქაძე არის პროფესიონალი ადამიანი, სუფთა წარსულით. 

„გაუგებარია ოპოზიციის ბრალდებები ნუგზართან დაკავშირებით. ის არის უპატიოსნესი ადამიანი, რაც მთავარია, სუფთა წარსულით. არანაირი დანაშაული არ აქვს ჩადენილი, არის პროფესიონალი, წლების განმავლობაში მუშაობდა უსაფრთხოების სამსახურში. შესაბამისად, პორფესიანალია იმ მიმართულებით, რა  სამსახურიც ჩავაბარეთ და დარწმუნებული ვარ, ის მას თავს გაართმევს. 

თუ მას არ მოსწონს გარკვეული ორიენტაციის ადამიანები, ეს მისი ნებაა. დღეს საქართველოში ყველას აქვს უფლება, გამოთქვას თავისი მოსაზრებები. რა თქმა უნდა, პირადად მე  ვეწინააღმდეგები ადამიანების ჩაგვრას, არასწორ მოპყრობას, თუმცა ადამიანებს აქვთ შესაძლებლობა თავისი მოსაზრებები გამოთქვან“, - განაცხადა თბილისის მერმა. 

თბილისის მერიის უსაფრთხოების სამსახურის პოსტზე კახა კალაძის მიერ წარდგენილმა ნუგზარ ჭონქაძემ  „რუსთავი 2-თან“ დაადასტურა, რომ ის სოციალურ ქსელში სულიკო კედელაშვილის ფსევდონიმით ჰომოფობიური და ქსენოფობიური შინაარსის განცხადებებს ავრცელებდა.