აჭარის ტურიზმისა და კურორტების დეპარტამენტის თავმჯდომარემ სულხან ღლონტმა ტელეკომპნია „პირველის“ პირდაპირ ეთერში განაცხადა, რომ 2017 წელს სასტუმრო „ლეოგრანდს“ არ მიუღია აჭარის ტურიზმის დეპარტამენტისგან სარეკომენდაციო ხასიათის ხარისხის ნიშანი, მიზეზი არასრული დოკუმენტაცია, მათ შორის სახანძრო სისტემასთან დაკავშირებული საკითხებიც იყო.

„ჩვენთან ხარისხის ნიშნის მინიჭება არის სარეკომენდაციო ხასიათის. ჩვენ 2017 წელს გავამკაცრეთ მოთხოვნები და როცა დაიწყო დოკუმენტაციების შევსება, ყველა იმ სასტუმრომ, რომელმაც წარმოადგინა დოკუმენტაცია და გამოთქვა სურვილი, რომ სარეკომენდაციო ხასიათის ხარისხის ნიშანი მიეღო, „ლეოგრანდს“ არ ჰქონდა სრულყოფილი დოკუმენტაცია და ერთ-ერთი არაკმარი დოკუმენტაცია იყო ზუსტად სახანძრო სისტემასთან დაკავშირებით“, - განაცხადა ღლონტმა

სულხან ღლონტის განცხადებით, ტურიზმის დეპარტამენტს არავითარი საკანონმდებლო უფლება არ აქვს, რომელიმე სასტუმროს მისცეს ფუნქციონირების უფლება, ან აუკრძალოს. 

ბათუმში სასტუმრო „ლეოგრანდში“ გაჩენილი ხანძრის შედეგად, შსს-ის ინფორმაციით, გარდაცვლილია 11 ადამიანი, მათ შორის, 10 საქართველოს, ხოლო 1 ირანის რესპუბლიკის მოქალაქე. ჰოსპიტალიზაცია დასჭირდა 21 ადამიანს. 

ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს. აღნიშნული მუხლი სახანძრო უსაფრთხოები წესების დარღვევას გულისხმობს, რამაც გამოიწვია ორი ან მეტი ადამიანის სიცოცხლის მოსპობა ან სხვა მძიმე შედეგი. ეს ნორმა სასჯელის ზომად  ხუთიდან რვა წლამდე თავისუფლების აღკვეთას ითვალისწინებს.