ჭუბერში მოსახლეობამ „ნენსკრაჰესის" სამუშაოებთან მისასვლელი გზა გადაკეტა.
ისინი კომპანიისგან სადენებისა და ხიდის შეკეთებას მოითხოვენ. მათი თქმით, კომპანიის მხირდან იყო დაპირებები, რომ გააკეთებდნენ გზას, ხიდსა და სადენებს, რაც დღემდე არ შესრულებულა. მათი თქმით, გზა მანამდე არ გაიხსნება, სანამ მათი მოთხოვნები არ შესრულდება.
„მოთხოვნები იყო სადენებისა და ხიდის რეაბილიტაცია. სადენების გაუმართაობას ადამიანის სიცოცხლეც შეეწია, ცეცხლი წაეკიდა, აქრობდა, დენმა დაარტყა და გარდაიცვალა. ხალხი გაღიზიანებულია, ქუჩაში გამოვიდა, გზა გადავკეტეთ. რაც შეეხება ხიდს, საზღვრისპირა სოფელია, საზღვარსა და სოფლის დამაკავშირებლები ხიდია გაფუჭებული, მეორე ხიდიც წაიღო წყალმა, დაახლოებით 10-15 კილომეტრის შემოვლა უწევს მესაზღვრეს, რომ სოფლამდე მივიდეს. გზა კიდევ იმიტომ გადავკეტეთ, რომ ყველა აქციაზე, მოთხოვნა და დაპირებები რაც იყო, არ შესრულებილა, ყელში აქვს ამოსული ხალხს“, - ამბობს „ლიბერალთან“ საუბრისას ადგილობრივი მოსახლე რატი დევდარიანი.
მისი თქმით აქცია გრძელდება, ხალხმაც მოიმატა და დაშლას არ აპირებენ.
