29 ნოემბერს, 12:00 საათზე „კონსტიტუციის 42-ე მუხლი“ საპატრულო პოლიციის მხრიდან არასათანადო მოპყრობის შესახებ პრესკონფერენციას გამართავს.
არასამთავრობო ორგანიზაციის ინფორმაციით, 26 ნოემბერს თბილისში ნიკოლაძის ქუჩაზე საკუთარი ავტომანქანით მოძრავი გიორგი პერტაია საპატრულო პოლიციამ გააჩერა, მიაყენა შეურაცხყოფა და დააკავა. იგი ავტომანქანაში მეუღლესა და არასრუწლოვან შვილთან ერთად იმყოფებოდა.
„მათ მომთხოვეს საბუთები, როდესაც მე გადავეცი ავტომანქანისა და ჩემი საბუთები პოლიციის თანამშრომლებმა დამიწყეს აგრესიული საუბარი, მომაყენეს სიტყვიერი შეურაცხყოფა და დამემუქრნენ. შემდეგ პოლიციის თანამშრომლებმა დამადეს ხელბორკილები, ჩამსვეს საპატრულო პოლიციის ავტომანქანაში და გადამიყვანეს დიღომში, დროებითი მოთავსების იზოლატორში. გზაში პოლიციის თანამშრომლები მაყენებდნენ როგორც სიტყვიერ, ასევე ფიზიკურ შეურაცხყოფას. ისინი მეუბნებოდნენ, რომ ვიყავი ნასვამი, ასევე ვიყავი ნარკომანი და ამის გამო დამიჭერდნენ. ჩემი უარყოფისა და ნარკოლოგიურში შემოწმების მოთხოვნის შემდეგ, მიპასუხეს, რომ არ იყო პრობლემა, რადგან ნარკოტიკებს ჩადებას მარტივად შეძლებდნენ. მუქარასა და გინებასთან ერთად მაყენებდნენ ფიზიკურ შეურაცხყოფასაც“ - „კონსტიტუციის 42-ე მუხლის" ინფორმაციით, აცხადებს გიორგი პერტაია.
ორგანიზაციის განცადებაში წერია, რომ 27 ნოემბერს პერტაია თბილისის საქალაქო სასამართლოში ადმინისტრაციული სამართალდარღვევის საქმის განხილვაზე გადაიყვანეს. მოსამართლემ პოლიციის თანამშრომლებს დაავალა დამატებითი მტკიცებულებების წარმოდგენა და პროცესი 5 დეკემბრისთვის გადადო.
„პოლიციის თანამშრომელთა ქმედებაში არის საქართველოს სისხლის სამართლის კოდექსის 333-ე მუხლით გათვალისწინებული დანაშაულის ნიშნები.
ყოველივე ზემოაღნიშნულიდან გამომდინარე, „კონსტიტუციის 42-ე მუხლი“ მოითხოვს საქართველოს სსსკ მე-100 მუხლის თანახმად, ამ ფაქტებთან დაკავშირებით დაიწყოს გამოძიება", - წერია განცხადებაში.
