საქართველოს პარლამენტის წევრის, სალომე ზურაბიშვილის თქმით, მან პარლამენტის პლენარულ სხდომაზე ნინო ლომჯარიას წინააღმდეგ მისცა ხმა და სახალხო დამცველის პოზიციაზე მხარს გიორგი ფოფხაძეს უჭერდა. თუმცა, იმის გამო, რომ ფოფხაძე „პატრიოტთა ალიანსმა“ წარადგინა, ზურაბიშვილმა მას მხარი არ დაუჭირა.
„არ მივეცი ხმა ლომჯარიას (ნეონაცს არ მივცემ) წინააღმდეგი ხუთიდან ერთი ხმა ჩემია... და, სამწუხაროდ, ვერ მივეცი ხმა ფოფხაძეს („პატრიოტთა ალიანსის“ კანდიდატს არ მივცემდი... ამიტომ თავი შევიკავე ) თორემ ძალიან დამაჯერებელი გამოსვლა ჰქონდა!“ - წერს საკუთარ Facebook-გვერდზე სალომე ზურაბიშვილი.
„პატრიოტთა ალიანსის“ მიერ სახალხო დამცველის კანდიდატაც წარდგენილი გიორგი ფოფხაძე პარლამენტის სხდომაზე სიტყვით 30 ნოემბერს გამოვიდა. გამოსვლაში ფოფხაძემ ლგბტ თემზე განაცხადა, რომ „უნდა აიკრძალოს მათი პროპაგანდისტული გამოსვლები, აფიშირება და აგიტაცია.“
„სექსუალური ორიენტაციის კუთხით არ უნდა ხდებოდეს ადამიანების დევნა და დისკრიმინაცია. მაგრამ მკაცრად უნდა აიკრძალოს ნებისმიერი მათი პროპაგანდისტული გამოსვლები, აფიშირება და აგიტაცია. რადგან არ შეიძლება ერთი ჯგუფის ინტერესების დაცვის საბაბით ირღვეოდეს მეორე ჯგუფის ინტერესები და უფლებები. ნუ დაგავიწყედებათ, რომ ჩვენი სახელმწიფო და მოქალაქეების დიდი ნაწილის აზროვნება, ცხოვრების წესი ტრადიციულ ფასეულობებზე და ზნეობრივ თუ მორალურ პრინციპებზე არის დაფუძნებული.“ - თქვა გიორგი ფოფხაძემ.
30 ნოემბერს, საქართველოს პარლამენტმა 96 ხმით 5-ის წინააღმდეგ სახალხო დამცველად ნინო ლომჯარია აირჩია. გიორგი ფოფხაძემ კი 20 ხმა მიიღო და 27 წინააღმდეგი იყო.