აუტმიზმის მქონე ბავშვების მშობლები ქუთასის მერიაში შეხვედრა გამართეს. მშობლების მოთხოვნაა, რომ მერიამ 100%-ით უზრუნველყოს აუტიზმის სპექტრის დარღვევის მქონე ბავშვთა რეაბილიტაციის დაფინანსება. ორგანიზაცია „ოჯახები დისკრიმინაციის წინააღმდეგ" ხელმძღვანელის, მარი კორკოტაძის თქმით, ეს პროგრამა ქუთაისში თითქმის ისეთივეა, როგორიც თბილისში, იმ განსხვავებით, რომ ნახევარს აქამდე აფინანსებდა ერთ-ერთი დონორი, ნახევარს კი მერია, თუმცა ახლა დონორი გავიდა პროგრამიდან და 40 ბავშვი რეაბილიტაციის გარეშე რჩება.
როგორც მარი კორკოტაძემ „ლიბერალს" უთხრა, მშობლებს მოთხოვნა ჰქონდათ, რომ ქუთაისის მერს, გიორგი ჭიღვარიას შეხვედროდნენ, თუმცა მშობლებს ვიცე-მერები - ნინო თვალთვაძე და გიორგი იობაშვილი შეხვდენენ. ვიცე-მერების განცხადებით, ამ ბავშვებიდან სრულად დააფინანსებენ მხოლოდ სოციალურად დაუცველებს, დანარჩენები კი იქნებიან თანადაფინანსებით.
„შეხვედრაზე მერიის მხრიდან ითქვა, რომ ამ ბავშვებიდან სრულად, 100%-ით დაფინანსდებიან ისინი, ვინც არიან სოციალურად დაუცველნი. დანარჩენები იქნებიან თანადაფინანსებით. ეს არის სრულიად მიუღებელი, რადგან ისევ დისკრიმინაცია ხდება ამ ბავშვების, ისევ სოციალურ სტატუსს აბამენ ამ ბავშვების კეთილდღეობას და განვითარებას. რაც არის არასწორი. შეხვედრაზე მშეობლებს უთხრეს, რომ მერია დაეხმარება მათ დონორების მოძიებაში, რათა დაფინანსდეს დანარჩენი ნაწილი. ვფიქრობ, რომ ეს არის მშობლების შეცდომაში შეყვანა, იქიდან გამომდინარე, რომ დონორები ფაქტობრივად თერაპიებს არ აფინანსებენ, თუ რაღაც განსაკუთრებული პროექტი არ აქვთ ამ კუთხით. ახლა დააფინანსონ ეს ბავშვები და პარალელურად მოიძიონ დონორები“, -განაცხადა მარი კორკოტაძემ.
მისი თქმით, მშობლების მოთხოვნები უცვლელი. ისინი მოუწოდებენ ასევე საპარლამენტო უმრავლესობის წევრს, რატი იონათამიშვილს ჩაერთოს და ლობირება გაუწიოს ამ საკითხს.
„მშობლები ახლა ისევ მოითხოვენ მერთან შეხვედრას. ასევე იგივეა ჩვენი მთავარი მოთხოვნა, 100%-ით დაფინანსდეს ეს ბავშვები და სარეზერვო თანხაც იყოს გამოყოფილი, რათა თუ ვინმეს დიაგნოზი დაესმევა, მათი დაფინანსებისთვისაც იყოს თანხა გამოყოფილი. ვთხოვთ რატი იონათამიშვილს, ჩაერთოს ლობირება გაუწიოს ამ საკითხს და დაგვეხმაროს. ჩვენ გვინდა, რომ 27 დეკემბრამდე, სანამ ბიუჯეტი დამტკიცდება შევიდეს ეს ცვლილებები“,- განაცხადა „ლიბერალთან“ მარი კორკოტაძემ.
