საქართველოს ახალგაზრდა იურისტთა ასოციაციის თავმჯდომარის სულხან სალაძის განცხადებით, საზოგადოებრივი მაუწყებლისთვის კომერციული რეკლამის განთავსების უფლება სარეკლამო ბაზარს დაანგრევს. სალაძის თქმით, ბიუჯეტიდან მაუწყებელზე ისედაც იმაზე გაცილებით მეტი თანხა იხარჯება, ვიდრე მაგალითად, გარემოს დაცვაზე.
„პრაქტიკულად, ეს ანგრევს სარეკლამო ბაზარს. მინდა გითხრათ, რომ სარეკლამო ბაზრის მთელი წილი რაც არის, ნახევარზე მეტი არის მარტო საზოგადოებრივი მაუწყებლის დაფინანსება ბიუჯეტიდან. მარტივად რომ ავიღოთ, მაგალითად, მომავალ წელს სახელმწიფო გაცილებით ნაკლებს დახარჯავს გარემოს დაცვაზე ჯამში აღებული, ვიდრე საზოგადოებრივი მაუწყებლის დაფინანსებაზე და ამ პირობებში მაუწყებელს ეძლევა რეკლამასთან დაკავშირებული დამატებითი ბენეფიტები.“ - თქვა სულხან სალაძემ.
საქართველოს პარლამენტმა „მაუწყებლობის შესახებ“ საკანონმდებლო პაკეტი მეორე მოსმენით დაამტკიცა. საკანონმდმებლო პაკეტს 85 მომხრე ჰყავდა და 6 მოწინააღმდეგე. ცვლილება რამდენიმე საკითხს ეხება, მათ შორის არის: საზოგადოებრივი მაუწყებლის საქმიანობის საჯაროობა, სამეურვეო საბჭოს ფუნქციები, მაუწყებლის შესყიდვები, ბიუჯეტი, კომერციული და სოციალური რეკლამის განთავსება.
