პარლამენტში უმცირესობის სხდომაზე „ევროპული საქართველოს“ წევრმა გიორგი კანდელაკმა პრემიერს, გიორგი კვირიკაშვილს საოკუპაციო ხაზის გადმოწევისა და ოთხოზორიას მკვლელობის შესახებ დაუსვა კითხვა, თუ რამდენი წერილი აქვს საქართველოს მთავრობას მიწერილი ევროპარლამენტისთვის, იმისთვის რომ საკითხი აქტუალური ყოფილიყო. კანდელაკის კითხვას სხდომაზე კამათი მოჰყვა.
გიორგი კვირიაშვილის თქმით, მან არ იცის რამდენი წერილი გაიგზავნა ევროპარლამენტში, მაგრამ, მისი თქმით, საერთაშორისო ფორმატში არ ჰქონია ისეთი შეხვედრა, სადაც ამ თემაზე არ გამახვილებულა ყურადღება.
გიორგი კანდელაკის განცხადებას, რომ საქართველოს მთავრობას არც ერთი წერილი არ მიუწერია ევროპარლამენტისთვის, პრემიერმა უპასუხა, რომ ოპოზიციონერი დეპუტატები და მათ შორის გიორგი კანდელაკი ანტისახელმწიფოებრივ წერილებს წერენ ევროპარლამენტს.
„სამარცხვინოა, რასაც თქვენ ქვეყნის წინააღმდეგ აკეთებთ, რა მიგაჩნიათ, სწორია ამის მიწერა ევროპისთვის რომ რუსები არიან ხელისუფლებაში? ამას წერს კანდელაკი მათ. თქვენ მსოფლიოს გინდათ დააჯეროთ ეს და ვეღარ გაგივიდათ, გატეხა სიმართლემ ის ფარდა, რომელიც თქვენ გაქვთ ჩამოშვებული, რომ საქართველოში მოვიდა პრორუსული ხელისუფელბა, ეგ აღარ გაქვთ ახლა სალაპარაკო და რაღაცებს აქ ცდილობთ. თქვენ, ბატონო გიგა, რებრენდიგი რომ გაიარეთ ახლა, ნუ გგონიათ, რომ ამას ახლა ვინმე დაგიჯერებთ საქართველოში“, - განაცხადა კვირიკაშვილმა.
