„თბილისის მერია გილოცავთ ახალ წელს“ - საახალწლო ვიდეორგოლის გადაღება-დამზადების მომსახურებისთვის მერია 115 186 ლარს გადაიხდის.

შესყიდვების სააგენტოს ვებგვერდზე განთავსებული დოკუმენტაციის თანახმად, თბილისის მერიამ შპს „ბეთერ ფლაისთან“ ხელშეკრულება 15 დეკემბერს გააფორმა. როგორც დოკუმენტშია აღნიშნული, სარეკლამო ვიდეორგოლის ქრონომეტრაჟი 40 წამი უნდა იყოს, წამში 25 კადრით და ის უნდა შეიცავდეს ინფორმაციას ახალი 2018 წლის მილოცვის თაობაზე.

ხელშეკრულების მიხედვით, მომსახურების გაწევის თარიღად დასახელებულია არაუგვიანეს 2017 წლის 20 დეკემბერი.

აღსანიშნავია, რომ მერიამ შპს „ბეთერ ფლაის" მომსახურება გამარტივებული შესყიდვის წესით შეიძინა, რაც ნიშნავს იმას, რომ მომსახურების გამწევ კომპანიას თავად შემსყიდველი (თბილისის მერია) ირჩევს და არ ცხადდება ტენდერი, სადაც მონაწილეობის მიღება სხვა დაინტერესებულ კომპანიებსაც შეუძლია.

შპს „ბეთერ ფლაის“ დირექტორი და წილის 100%-ის მფლობელი არის დავით ჯაში.

სახელმწიფო აუდიტის სამსახურის მონაცემებით, დავით ჯაშმა 2016 წელს პარტია „ქართულ ოცნებას“ 60 000 ლარი შესწირა.

როგორც „ლიბერალს“ მერიის პრესსამსახურში განუცხადეს, ვიდეოგროლს საზოგადოება  25 დეკემბრიდან იხილავს.