ზვიად რატიანის ადვოკატის, ანა ნასრაშვილის თქმით, დღეს ჩანიშნულ სასამართლო პროცესზე რატიანი ჯანმრთელობის მდგომარეობის გამო ვერ გამოცხადდება. შესაბამისად, ის პროცესის გადადებას მოითხოვს. „ის არის მწოლიარე მდგომარეობაში, ტვინის შერყევის გამო. ამის შესახებ სასამართლოს მივაწვდით ინფორმაციას და მოვითხოვთ სასამართლო პროცესის გადადებას მანამდე, სანამ რატიანს შეეძლება პროცესზე დასწრება.“ - თქვა თბილისის საქალაქო სასამართლოში ანა ნასრაშვილმა.
ადვოკატ ნასრაშვილის თქმით, ზვიად რატიანი უარყოფს პოლიციის მიერ გავრცელებულ ინფორმაციას, თითქოს პოეტი ქუჩაში უმისამართოდ იგინებოდა და სამართალდარღვევის ოქმის შედგენის დროს პოლიციას წინააღმდეგობა გაუწია. „ის, რა თქმა უნდა, უარყოფს იმ ინფორმაციას, თითქოს თამარ მეფის გამზირზე მარტოდ მყოფი უმისამართოდ იგინებოდა და რაც გახდა ადმინისტრაციული სამართალდარღვევის ოქმის შედგენის საფუძველი, როგორც ამას პოლიციის თანამშრომლები დაკავების ოქმში მიუთითებენ, ასევე, ამბობს, რომ მისი მხრიდან სამართალდარღვევა არ ყოფილა. შესაბამისად, ეს იქნება ჩვენი პოზიცია სასამართლო პროცესზე.“
თბილისის პროკურატურამ ზვიად რატიანის საქმეზე პოლიციის თანამშრომელთა მხრიდან უფლებამოსილების სავარაუდო გადამეტების ფაქტზე გამოძიება დაიწყო. გამოიკითხა თავად რატიანი და დაინიშნა სასამართლო სამედიცინო ექსპერტიზა. ანა ნასრაშვილის თქმით, ის პროკურატურას დღეს მიმართავს და ზვიად რატიანისთვის დაზარალებულის სტატუსის მინიჭებას მოითხოვს.
