პარლამენტში ჯანმრთელობის დაცვისა და სოციალურ საკითხთა კომიტეტში ნარკოპოლიტიკის კანონპროექტის განხილვა დღეს უნდა დაწყებულიყო, თუმცა კანონპროექტს კომიტეტის 7 წევრი  პროტესტს უცხადებს და სხდომაზე დასწრებაზე უარს ამბობს, რის გამოც კვორუმი ვერ შედგა და კომიტეტში კანონპროექტის განხილვა ვერ იწყება. 

კომიტეტის წევრები, რომლებიც კანონპროექტს პროტესტს უცხადებენ: დიმიტრი ხუნდაძე, მირიან წიკლაური, ილია ნაკაშიძე, კობა ნაკაიძე, ლევან ბეჟანიძე, დიმიტრი მხეიძე, კობა ნარჩემაშვილი. როგორც მათ განაცხადეს, ნარკოპოლიტიკის კანონპროექტის შესახებ ერთობლივი განცხადების გაკეთებას აპირებენ.

ამ წუთებში კომიტეტის წევრებთან ერთად სათათბირო ოთახში იმყოფებიან კომიტეტის თავმჯდომარე აკაკი ზოიძე და თავმჯდომარის მოადგილე ლევან კობერიძე. შეხვედრის მონაწილეებს შორის არის ჯანდაცვის კომიტეტის წევრი მარიამ ჯაში. ისინი დახურულ კარს მიღმა საუბრობენ.

პარლამენტში ივნისში „ნარკოპოლიტიკის ეროვნული პლატფორმის“ ავტორობით მომზადებული კანონპროექტი დარეგისტრირდა, რომელიც ყველა სახის ნარკოტიკის მოხმარების და მცირე ოდენობით ფლობის დეკრიმინალიზებას ითვალისწინებს. პროექტში ასევე ადეკვატურადაა გაწერილი ნარკოტიკული საშუალებების ოდენობები. კანონპროექტს თან ახლავს სამკურნალო-სარეაბილიტაციო პროგრამების განვითარების კონცეფციაც.