პარლამენტის ჯანდაცვის კომიტეტმა 2-საათიანი შეფერხების შემდეგ კომიტეტის სხდომა დაიწყო. კომიტეტის სხდომაზე ნარკოპოლიტიკის კანონპროექტის განხილვა კომიტეტის 7 წევრის პროტესტის გამო ვერ დაიწყო, რადგან კვორუმის შეკრება ვერ ხერხდებოდა. დიმიტრი ხუნდაძე, მირიან წიკლაური, ილია ნაკაშიძე, კობა ნაკაიძე, ლევან ბეჟანიძე, დიმიტრი მხეიძე და კობა ნარჩემაშვილი კანონპროექტს მხარს არ უჭერენ.
უმრავლესობის წევრი დიმიტრი ხუნდაძე, რომელიც სხდომას პროტესტის ნიშნად არ ესწრება, ამბობს, რომ ეს კანონპროექტი შეიცავს რისკს, რომ ნარკომომხმარებელთა რაოდენობა გაიზრდება. მისი თქმით, სამართლებრივი რეგულაციები უნდა იყოს იმდაგვარი, რომ ეს რაოდენობა შემცირდეს.
„ვეწინააღმდეგებით კანონპროექტის ამ ფორმით შემოტანას, რადგან ის შეიცავს რეალურ რისკს, რომ ქვეყანაში გაიზრდება მომხმარებელთა რიცხვი, სამართლებრივი რეგულაციები უნდა იყოს იმდაგვარი, რომ ეს რიცხვი იქნას შემცირებული, ჩვენ რა თქმა უნდა ვემხრობით, რომ არ დავიჭიროთ, მაგრამ უნდა იყოს შესაბამისი სერვისები, შესაბამისი სამართლებრივი რეგულაციები, რომ არ მოხდეს ქვეყანაში ნარკომომხმარებელთა რიცხვის აფეთქება“, - განაცხადა დიმიტრი ხუნდაძემ.
მისი თქმით, დღეს კვორუმი შედგა ოპოზიციის დეპუტატების დახმარებით და ამბობს, რომ ამ საკითხზე შეთანხმება უნდა მოხდეს უმრავლესობის ფორმატში, რადგან ეს არის მაღალი რისკის კანონპროექტი.
„კომიტეტი მაინც შედგა, მაგრამ ის შედგა ოპოზიციის წევრების დახმარებით, მაგრამ მე ვფიქრობ შეთანხმება უნდა მოხდეს უმრავლესობის ფორმატში, რადგან ამ მაღალი რისკის კანონპროექტში, რომელიც არის შემითავაზებული, უნდა მოხდეს რისკების მინიმალიზება, რადგან ეს კანონპროექტი ეხება არა მხოლოდ ნარკომომხმარებლებს, არამედ საზოგადოების უდიდეს ნაწილს, ვინც არ მოიხმარს ნარკოტიკებს, ამიტომ ჩვენ, ვინც ვართ მოწინააღმდეგე ამ კანონპროექტისა, მოვითხოვთ უმრავლესობის ფორმატში ამ საკითხის განხილვას“, - განაცხადა ხუნდაძემ.
