„მე ვესაუბრე ჯგუფს, რომელიც დიდი ხანია მუშაობს თემაზე, რომელიც უაღრესად მნიშვნელოვანია საზოგადოებისთვის - უფრო ადეკვატური ნარკოპოლიტიკის ჩამოყალიბება, ვიდრე ის ძალადობრივი ნარკოპოლიტიკა, რომელიც ათწლეულების განმავლობაში თანამედროვე ქართულ, ასევე საბჭოთა სისტემაში ბევრ ადამიანს უნგრევდა ცხოვრებას და ამავე დროს არავითარი გამოსწორება ნარკოტიკების სტატისტიკაში არ მოიტანა", - ამის შესახებ საქართველოს პრეზიდენტმა გიორგი მარგველაშვილმა ნარკოპოლიტიკასთან დაკავშირებით სამოქალაქო საზოგადოების წევრებთან შეხვედრის შემდეგ განაცხადა.
„შესაბამისად, ჩვენ დღეს ვხედავთ, რომ, საქართველოში მუშაობდა და სამწუხაროდ, მუშაობს ნარკოპოლიტიკა, რომლის შედეგიც სტატისტიკის თვალსაზრისით არ არის, რომელიც აუბედურებს ბევრ ადამიანს, რომელიც ასევე სამართალდამცველების წინაშე აყენებს ძალიან პრობლემურ არჩევანს და ჩვენ ვხედავთ ჯგუფს, რომელიც პროფესიულად მუშაობს უფრო ჰუმანურ ნარკოპოლიტიკასთან დაკავშირებით. ეს ჯგუფი თანამშრომლობს ჩვენს დეპუტატებთან, რომლებიც მოწოდებული უნდა იყვნენ, რომ ადეკვატურობის და ლოიალურობის შესაბამისი კანონმდებლობა შექმნან.
მე ძალიან მიხარია, რომ ჩვენს საზოგადოებაში იხილება ეს თემა. მე მიხარია, რომ ნელნელა გამოვდივართ იმ სტერეოტოპებიდან, რომელიც ჩვენი მოქალაქეების სტიგმატიზაციას ახდენდა. შემიძლია ზოგადად ვუთხრა ყველას, ვინც ამ საკითხზე ფიქრობს - როდესაც შენი პოლიტიკა უკეთეს შედეგს არ იძლევა, როცა ის აკრძალვები და სიმკაცრეები, რომელიც მოიფიქრე შედეგს, არ გაძლევს, ჯობია, რომ ეს აკრძალვები მოხსნა, ჯობია ადამიანები თავისუფლები იყვნენ და ადამიანებმა თავად გადაწყვიტონ თავიანთი ბედი", - განაცხადა პრეზიდენტმა.
