დღეს საქართველოს აგრარულ საკითხთა კომიტეტში აზიური ფაროსანას წინააღმდეგ ბრძოლის საკითხი განიხილეს. „ქართული ოცნების" დეპუტატმა, დავით ჭიჭინაძემ მოსახლეობისთვის ფაროსანასთან ბრძოლის მეთოდებზე ინფორმაციის მიწოდება და სწავლება არასაკმარის ღონისძიებად მიიჩნია და აღნიშნა, რომ „გლეხს სწავლა რომ უნდოდეს, გლეხი არ იქნებოდა და სხვა გზას მონახავდა ცხოვრებაში".
„ლიბერალი“ დაინტერესდა, რა განათლება აქვს თავად დავით ჭიჭინაძეს. პარლამენტის ვებგვერდზე გამოქვეყნებული ინფორმაციის მიხედვით, მეცხრე მოწვევის დეპუტატმა საქართველოს ტექნიკური უნივერსიტეტი დაამთავრა, სპეციალობით - სამდინარო ნაგებობების ჰიდროტექნიკური მშენებლობა.
იმ ინფორმაციის მიხედვით კი, რომელიც პარლამენტარის მეხუთე მოწვევის დეპუტატობას ეხება (1999-2004), მისი განათლების გრაფაში აღნიშნულია, რომ უმაღლესი განათლება დაუმთავრებელი აქვს.
ბიოგრაფიული ლექსიკონის თანახმად, პარლამენტარმა 1983 წელს დაწყებული კურსი 2000 წელს დახურა, მაშინ, როდესაც მეხუთე მოწვევის დეპუტატი იყო, ბლოკიდან - „საქართველოს აღორძინება".
