საზოგადოებრივი მაუწყებლის სამეურვეო საბჭოს ყოფილი წევრი ლელა გაფრინდაშვილი, მაუწყებლის სამეურვეო საბჭოს ღია სხდომის გამართვას მოითხოვს.
„მე მოვითხოვ საზოგადოებრივი მაუწყებლის სამეურვეო საბჭოს ღია სხდომას, კამერებით. ასეთი სხდომა წერტილს დაუსვამს ამ აბსურდს. მე მზად ვარ და ველოდები ბორდის წევრების გამოხმაურებას. იმედი მაქვს, ამ საკითხის გადაწყვეტას 6 თვე არ დასჭირდება“, - წერს facebook პოსტში ლელა გაფრინდაშვილი.
„ეს შესაძლოა იყოს კომპრომეტირების მცდელობა" - ამბობს ლელა გაფრინდაშვილი, აუდიტის იმ დასკვნასთან დაკავშირებით, რომლის მიხედვითაც, საზოგადოებრივი მაუწყებლის ბორდის ერთ-ერთი წევრი ჰონორარს უფლებამოსილების ამოწურვის შემდეგ, 5 თვის განმავლობაში იღებდა, საუბარია 12 800 ლარზე. მოგვიანებით გაირკვა, რომ ეს წევრი ლელა გაფრინდაშვილი იყო.
„ლიბერალი" ლელა გაფრინდაშვილს ესაუბრა, ის ამბობს, რომ მას მართლაც ერიცხებოდა თანხა, თუმცა მიიჩნევდა, რომ ეს იყო ანაზღაურება კვლევითი სამუშაოსთვის, რომელსაც იგი საზოგადოებრივი მაუწყებლისთვის ეწეოდა. კვლევა ეხება საზოგადოებრივი საბჭოების კონცეფციას. გაფრინაშვილის თქმით, ის პერიოდულად აყენებდა საქმის კურსში ბორდის თავმჯდომარეს და წევრებს კვლევის მიმდინარეობის შესახებ.
„ლიბერალი“ ცდილობს, მაუწყებლის სამეურვეო საბჭოს ხელმძღვანელს გრიგოლ გოგელიას დაუკავშირდეს და გაარკვიოს, გაითვალისწინებს თუ არა საბჭო გაფრინდაშვილის მოთხოვნას.
