იუსტიციის უმაღლესი საბჭოს წევრმა, ნაზი ჯანეზაშვილმა, იუსტიიციის უმაღლეს საბჭოში მოსამართლეებთან გასაუბრება დროებით დატოვა, რადგან, მისი თქმით, საბჭოს არამოსამართლე წევრმა შოთა ქადაგიძემ მას არაკორექტულად მიმართა. ჯანეზაშვილის განცხადებით, გაღიზიანება მის განცხადებებს და შეკითხვას მოჰყვა, თუ რატომ მოითხოვდნენ მოსამართლეები ანა დოლიძის გასაუბრებიდან აცილებას.
„ძველი ბიჭები გვყავს საბჭოში. ჩემმა შეკითხვამ კრიტიკული დამოკიდებულება გამოიწვია. მან არაკორექტულად მომმართა. შოთა ქადაგიძე სრულიად ამოვარდნილია იუსტიციის საბჭოს წევრის სტატუსიდან. მგონი არც იცის, რომ საბჭოს წევრია, იმდენად არაკორექტულად იქცევა საბჭოს წევრის მისამართით. თავმჯდომარეს ვთხოვე, შეეხსენებინა ქადაგიძისთვის მისი ვალდებულებები. ამასთან, შოთა ქადაგიძე გამოირჩევა მოსამართლე წევრების პოზიციის მხარდაჭერით და ჩემი აზრით, მათი დავალებების შემსრულებელია.
ჩემთვის მიუღებელია, როდესაც საბჭოს წევრი მომმართავს ისე, როგორც ქუჩური გარჩევებისას. ჩემი პოზიცია გამოვხატე ლეილა მამულაშვილის შუამდგომლობასთან [მამულაშვილმა ანა დოლიძის აცილება მოითხოვა] დაკავშირებით და მიმაჩნია, რომ ეს არის დაუსაბუთებელი, თუმცა ისიც აღვნიშნე, რომ „ადეიშვილის ნარჩენებთან“ დაკავშირებით დოლიძის პოზიციას არ ვიზიარებ", - აცხადებს ჯანეზაშვილი, - „მე, როგორც საბჭოს წევრი, ვალდებული ვარ, კონკრეტული კანდიდატი შევაფასო იმ კანონის შესაბამისად, რომელიც ჩვენ გვაქვს. კრიტერიუმების ჩამონათვალი საკმაოდ ვრცელია, ამიტომ მე ამ ფარგლებიდან როგორც წევრი არ გამოვიდოდი, ვინაიდან მნიშვნელოვანია, რომ ჩვენ სამართლებრივ ფორმატში ვიმსჯელოთ ამ საკითხებზე".
როგორც ჯანეზაშვილი ამბობს, დღევანდელი გასაუბრება სრულიად ამოვარდნილია კალაპოტიდან. „ვიდრე იგი დაიწყებოდა იუსტიციის საბჭოს მოსამართლე წევრმა სერგო მეთოფიშვილმა ჩემგან მოითხოვა პასუხები, რატომ მივეცი მედიას კომენტარი იმის შესახებ, რომ საბჭოს მოსამართლე წევრები არღვევენ ეთიკის ნორმებს. დიახ, ისინი არღვევენ ეთიკის ნორმებს", - ამბობს ნაზი ჯანეზაშვილი.
იუსტიციის უმაღლესი საბჭო უვადო მოსამართლეობის მსურველ კანდიდატებთან გასაუბრებას 8 თებერვლის ჩათვლით მართავს.
