ტელეკომპანია „რუსთავი 2-ის“ დირექტორმა, ნიკა გვარამამ დღეს ფეისბუქგვერდზე „ტვ პირველთან“ დაკავშირებით დაწერა, რომ შესაძლოა, ხელისუფლებას ტელეკომპანიის სარედაქციო საქმიანობაში ჩარევის მცდელობა ჰქონდეს. მან ამავე სტატუსში აღნიშნა, რომ პრობლემებზე სალაპარაკოდ ტელეკომპანიის წარმომადგენლები არასამთავრობო ორგანიზაციების წარმომადგენლებს კონფიდენციალურად შეხვდნენ.
„ტვ პირველის“ მენეჯმენტსა არასამთავრობო ორგანიზაციების წარმომადგენლებს შორის შეხვედრა გასულ კვირაში გაიმართა. შეხვედრის შესახებ ინფორმაცია „ლიბერალს“ შეხვედრის რამდენიმე მონაწილემ დაუდასტურა.
სტუდია „მონიტორის“ ხელმძღვანელის, ნინო ზურიაშვილის თქმით, შეხვედრაზე ტელევიზიის წარმომადგენლებმა ტელევიზიასთან დაკავშირებული პრობლემების შესახებ ისაუბრეს. მისივე თქმით, პრობლემების შინაარსზე საუბრის უფლება არ აქვს, რადგან შეხვედრა კონფიდენციალური იყო.
„ერთადერთი იმის თქმა შემიძლია, რომ შეხვედრაზე სარედაქციო პოლიტიკაში ჩარევის შესახებ საუბარი არ ყოფილა“ - განუცხადა „ლიბერალს“ ნინო ზურიაშვილმა.
შეხვედრა რომ შედგა, ეს ფაქტი „ლიბერალთან“ ჟურნალისტური ეთიკის ქარტიის დირექტორმაც დაადასტურა, თუმცა დეტალებზე ვერაფერი გვითხრა, რადგან შეხვედრის შინაარსი კონფიდენციალური იყო.
არის თუ არა პრობლემები ტვ პირველში და ემუქრება თუ არა რამე არხის სარედაქციო დამოუკიდებლობას ? - ეს კითხვა "ლიბერალმა" ტვ პირველის წამყავნს ნინო ჟიჟილაშვილს დაუსვა.
"ტვ პირველზე არ შეცვლილა არაფერი. ვიდრე ეს გუნდი აქ ვმუშაობთ, სრული პასუხისმგებლობით შემიძლია გითხრათ, რომ სარედაქციო პოლიტიკა არის და დარჩება კრიტიკული, მიუკერძოებელი და დაბალანსებული. არხს ყოველდღე ემატება მაყურებელი, აქვს ნდობის მაღალი ხარისხი, მზარდი რეიტინგი და ამ ეტაპზეც და სამომავლოდაც ეს არის ჩვენი ერთადერთი საზრუნავი." - განუცხადა "ლიბერალს" ნინო ჟიჟილაშვილმა.
