სამედიცინო საქმიანობის სახელმწიფო რეგულირების სააგენტოს ფარმაცევტული საქმიანობის დეპარტამენტის ყოფილ უფროსს დავით მაჭარაშვილს საპროცესო შეთანხმება გაუფორმდა. ამის შესახებ ინფორმაცია „ლიბერალს“ პროკურატურაში დაუდასტურეს.

უწყების განმარტებით, საპროცესო შეთანხმება ფორმდება მხოლოდ იმ შემთხვევაში თუ პირი ბრალს აღიარებს.

დავით მაჭარაშვილი 2017 წლის 6 მარტს, ფინანსთა სამინისტროს საგამოძიებო სამსახურმა დააკავა. მას თავდაპირველად აღკვეთის ღონისძიებად პატიმრობა შეეფარდა, ხოლო შემდეგ წინასწარი პატიმრობა შეეცვალა და გირაოს სახით 15 000 ლარის გადახდა დაეკისრა.

„საქმეზე ჩატარებული გამოძიებით დადგინდა, რომ დავით მაჭარაშვილმა, ფსიქოტროპული და მასთან გათანაბრებული მედიკამენტების კვოტირებისა და მედიკამენტების იმპორტის რაოდენობის დადგენის პროცესში, ორ კომპანიას მიანიჭა არამართლზომიერი უპირატესობა, რის შედეგადაც, ქვეყანაში, მიმოქცევაში მოხვდა არსებულ საჭიროებაზე მეტი ფსიქოტროპული და მასთან გათანაბრებული მედიკამენტები“,- ნათქვამი იყო ფინანსთა სამინისტროს საგამოძიებო სამსახურის მიერ გავრცელებულ განცხადებაში.

საქმეზე გამოძიება სისხლის სამართლის კოდექსის 332-ე მუხლის პირველი ნაწილით (სამსახურებრივი უფლებამოსილების ბოროტად გამოყენება) და 25-332-ე მუხლის პირველი ნაწილით მიმდინარეობდა, რაც სასჯელის სახით 3 წლამდე ვადით თავისუფლების აღკვეთას ითვალისწინებს.

ე.წ. სააფთიაქო ნარკომანია - გამოწვევა, რომელიც გამოწვევად რჩება