საპარლამენტო უმრავლესობის წევრის ოთარ დანელიას აზრით, ინფრასტრუქტურის მინისტრი სათანადოდ ვერ აღიქვამს ფაროსანას პრობლემას საქართველოში და ეს შემაშფოთებელია. მისი თქმით, უწყებათშორისი კომისიის მუშაობაში, რომელიც ფაროსანას წინააღმდეგ ბრძოლის ღონისძიებებს გეგმავს, ზურაბ ალავიძე თითქმის არ მონაწილეობს.
„მაქვს განცდა, რომ არასათანადოდ არის აღქმული ის პრობლემა, რაც ჩვენ გვექნება მიმდინარე წელს. მე შეგახსენებთ, გასულ წელს სამეგრელოს, იმერეთის სოფლებს, გურიას, აჭარას ფაქტობრივად გადაუარა ფაროსანამ და ძალიან დიდი ზიანი მიაყენა. განსაკუთრებით შემაშფოთებელია, რომ ინფრასტრუქტურის მინისტრი ფაქტობრივად არ ესწრება შეხვედრებს, ის ტოვებს მათ დაწყებიდან რამდენიმე წუთში და ერთხელაც არ მინახავს ჩასული რეგიონში.“ - თქვა „ქართული ოცნების“ წევრმა. სამაგიეროდ, დანელიამ მადლობა გადაუხადა სოფლის მეურნეობის მინისტრს, რომელმაც მისი აზრით, ფაროსანასთან ბრძოლის კარგი მოსამზადებელი გეგმა შეიმუშავა და ბევრი იმუშავა ამისთვის.
ოთარ დანელიამ პრემიერ-მინისტრს მოუწოდა, რომ უწყებათშორის კომისიას მან უხელმძღვანელოს, რათა პარაზიტის წინააღმდეგ ბრძოლა უფრო ეფექტიანად დაიგეგმოს. „მე მოვუწოდებ პრემიერმინისტრს, ჩემი აზრით, განსაკუთრებით ეფექტური იქნება, თუ ის თავად უხელმძღვანელებს კომისიას, ვინაიდან ამაზე დიდი საფრთხე ქვეყანაში არ არსებობს, ის არაფრით ჩამოუვარდება იმ ვითარებას, რაც ხანძრის დროს იყო ბორჯომში და მთვრობის იმავე ფორმით კონსოლიდაცია არის ძალიან მნიშვნელოვანი“, - თქვა საპარლამენტო უმრავლესობის წევრმა.
