რეგიონული განვითარებისა და ინფრასტრუქტურის მინისტრის, ზურაბ ალავიძის თქმით, მისთვის გაუგებარი იყო ოთარ დანელიას განცხადება, რომ ფაროსანას საშიშროებას სათანადოდ არ აფასებს და ამ თემაზე უწყებათაშორისი კომისიის შეხვედრებს რამდენიმე წუთში ტოვებს.
„სხდომაზე ვიჯექი ჩვეულებრივად, დაახლოებით ერთი საათი. ფაროსანას წინააღმდეგ ბრძოლაში მობილიზებულები ვართ თავიდან ბოლომდე, მთელი ქვეყნის მასშტაბით. მაქსიმუმს გავაკეთებთ, რომ ეს ჭირი დავამარცხოთ. ყოველ შემთხვევაში, წელს დიდი რაოდენობით შევამსუბუქოთ ის დაწოლა, რაც ფაროსანაზე გვაქვს. ერთ წელიწადში ამის მთლიანად მოგვარება ძალიან რთული იქნება“, - განაცხადა ზურაბ ალავიძემ.
აგრარულ საკითხთა კომიტეტის თავმჯდომარემ, ოთარ დანელიამ დღეს თქვა, რომ უწყებათშორისი კომისიის მუშაობაში, რომელიც ფაროსანას წინააღმდეგ ბრძოლის ღონისძიებებს გეგმავს, ზურაბ ალავიძე თითქმის არ მონაწილეობს.
„მაქვს განცდა, რომ არასათანადოდ არის აღქმული ის პრობლემა, რაც ჩვენ გვექნება მიმდინარე წელს. მე შეგახსენებთ, გასულ წელს სამეგრელოს, იმერეთის სოფლებს, გურიას, აჭარას, ფაქტობრივად, გადაუარა ფაროსანამ და ძალიან დიდი ზიანი მიაყენა. განსაკუთრებით შემაშფოთებელია, რომ ინფრასტრუქტურის მინისტრი, ფაქტობრივად, არ ესწრება შეხვედრებს, ის ტოვებს მათ დაწყებიდან რამდენიმე წუთში და ერთხელაც არ მინახავს ჩასული რეგიონში.“ - თქვა „ქართული ოცნების“ წევრმა.
