„გახადე შრომა უსაფრთხო“ - ამ მოწოდებით ვარდების მოედნიდან მუშების მსვლელობა დაიწყო.
საქართველოს პროფკავშირების გაერთიანების ორგანიზებით დასაქმებულთა საპროტესტო მსვლელობა პარლამენტის შენობამდე გაგრძელდება.
პროფკავშირების წარმომადგენლების შეფასებით, „შრომის უსაფრთხოების შესახებ“ კანონპროექტი, რომელიც დღეს პარლამენტში განიხილება, არ გვთავაზობს ინსპექტირების ეფექტიან მექანიზმს.
მუშების მოთხოვნაა, საქართველოს პარლამენტმა სრულად გაითვალისწინოს საქართველოს პროფკავშირების გაერთიანების რეკომენდაციები, დაუყოვნებლივ მიიღოს შესაბამისი კანონმდებლობა, უზრუნველყოს სიცოცხლისთვის უსაფრთხო სამუშაო გარემო და ღირსეული შრომა.
საპროტესტო მსვლელობაში ინდუსტრიული ქალაქებიდან და სხვადასხვა რეგიონიდან ჩამოსული დასაქმებულები მონაწილეობენ.
„მუშა, რომელიც ჯერ არ მომკვდარა, შენ ხარ"- ამ შეძახილებით მოქალაქეები პარლამენტის შენობისკენ მიემართებიან.
