თურქეთის პრეზიდენტ რეჯეფ ტაიპ ერდოღანს 6 წლის გოგოსთვის ნათქვამი სიტყვებისთვის აკრიტიკებენ, რომ მისთვის დიდი პატივი იქნება, თუკი თურქეთს შეეწირება. 

ერდოღანმა მტირალი გოგონა, 6 წლის ამინე ტირასი პარტიის კონგრესზე სიტყვით გამოსვლისას შენიშნა და სცენაზე აიყვანა. „მას ჯიბეში თურქეთის დროშა უდევს. თუკი იგი თურქეთს შეეწირება, ღვთის ნებით, ამ დროშას გადავაფარებთ", - უთხრა პრეზიდენტმა დარბაზში მსხდომთ.

პრეზიდენტის სიტყვებს კრიტიკა მოჰყვა. მოქალაქეების თქმით, მან ბავშვს სიკვდილი არ უნდა უსურვოს და მით უმეტეს არ უნდა თქვას, რომ ეს უფლის ნებით მოხდება. 

haaretz.com-ის ინფორმაციით, ბოლო რამდენიმე კვირის განმავლობაში ერდოღანი ხშირად ესწრება ღონისძიებებს, სადაც სამხედრო ფორმაში ჩაცმული ბავშვები ეროვნული სულისკვეთების ლექსებს კითხულობენ.

ყოფილმა მინისტრმა, იასარ ოკუტანმა განაცხადა, რომ პრეზიდენტი ბავშვებს 2019 წლის ადგილობრივი არჩევნებისთვის ელექტორატის მოსაზიდად იყენებს და განაცხადა, რომ ნაკლებად სავარაუდოა, იგივე საკუთარ შვილიშვილს უსურვოს.