უნივერსიტეტის მაღლივი კორპუსიდან პეკინის ქუჩამდე ველობილიკი მოეწყობა. ამ მომსახურებისა და ვაჟა-ფშაველას გამზირზე არსებული გამწვანების თარგების სარეაბილიტაციო სამუშაოებისთვის თბილისის მერიამ ტენდერი უკვე გამოაცხადა. წინადადებების მიღება 2-დან 5 მარტამდე გაგრძელდება. შესყიდვის სავარაუდო ღირებულება 31 860 ლარია.
სატენდერო პირობების თანახმად, ველობილიკი დაიწყება უნივერსიტეტის მაღლივი კორპუსიდან, გაივლის სანდრო ეულის ქუჩას, ვაჟა-ფშაველას გამზირს, მარიჯანისა და ქავთარაძის ქუჩებს, ალექსანდრე ყაზბეგის გამზირს და მთავრდება პეკინის ქუჩაზე, სადაც უნდა მიუერთდეს არსებულ ველობილიკს.
საპროექტო ველობილიკის სავარაუდო სიგრძე 5100 მ-ია, ხოლო სიგანე ერთი მიმართულებით უნდა იყოს 1,5 მ. ორივე მიმართულებით კი ველობილიკის საერთო სიგანე - 3 მ.
„მომსახურების მიწოდება მიზნად ისახავს საპროექტო უბანზე სრულყოფილი საველე საკვლევაძიებო სამუშაოების ჩატარებას და შესაბამისი საგზაო სამოსის გათვალისწინებით ახალი ველო-ბილიკის მოწყობის სამუშაოების საპროექტო-სახარჯთაღრიცხვო დოკუმენტაციის შედგენას. გეგმაში ველო-ბილიკი ძირითადად უნდა მოეწყოს ტროტუარის გვერდით არსებულ გზის სავალ ნაწილზე, ხოლო სიმაღლეში უნდა დაპროექტდეს ისეთ დონეზე, რომ გათვალისწინებულ იქნას წყლის აცილება, როგორც საპროექტო ბილიკზე, ასევე არსებულ ტროტუარზე და დარჩენილ გზის სავალ ნაწილზე. ამისათვის საჭირო გახდება ტროტუარის ბორდიურთან არსებული სანიაღვრე ჭების დემონტაჟი და ახალი ჭების მოწყობა ველო-ბილიკის ახალ ბორდიურებთან“,- ვკითხულობთ სატენდერო პირობებში.