ბრიტანეთის პრემიერ-მინისტრის განცხადებით, ის მუდმივად მოუწოდებს რუსეთის პრეზიდენტს ვლადიმერ პუტინს, გაიყვანოს შეიარაღებული ძალები საქართველოს ოკუპირებული ტერიტორიებიდან, - ამის შესახებ ტერეზა მეიმ პარლამენტში რუსეთის შესახებ გამართული დებატებისას განაცხადა.
„დიდი ბრიტანეთის მთავრობა მუდმივად მოუწოდებს პუტინის ადმინისტრაციას, გაიყვანოს ჯარი საქართველოს ოკუპირებული ტერიტორიებიდან და ეს სხვადასხვა ფრონტზე ხდება და ასეც გაგრძელდება“, – განაცხადა ტერეზა მეიმ.
დიდმა ბრიტანეთმა 23 რუსი დიპლომატი დაითხოვა - BBC-ის ინფორმაციით, დიდი ბრიტანეთის პრემიერმა, ტერესა მეიმ მათ ქვეყნის დასატოვებლად ერთი კვირა მისცა და „არადეკლარირებული დაზვერვის ოფიცრები" უწოდა.
ბრიტანეთი რუსეთს დაზვერვის ყოფილი აგენტის სერგეი სკრიპალისა და მისი ქალიშვილის იულია სკრიპალის მოწამვლაში ადანაშაულებს. ისინი საავადმყოფოში კრიტიკულ მდგომარეობაში იმყოფებიან.
რუსეთმა სერგეი სკრიპალის მკვლელობის მცდელობასთან კავშირი უარყო. დიპლომატების გაძევების გარდა, ლონდონმა მიწვევა გაუუქმა რუსეთის საგარეო საქმეთა მინისტრს, სერგეი ლავროვს.
ბრიტანელი მაღალჩინოსნები და სამეფო ოჯახის წარმომადგენელბი კი არ დაესწრებიან მსოფლიო საფეხბურთო ჩემპიონატს, რომელიც ზაფხულში, რუსეთში გაიმართება. ასევე, გამკარცდება რუსეთიდან ჩასული კერძო თვითმფრინავებისა და რუსეთის მოქალაქეთა საბაჟო კონტროლი. თუმცა პრემიერ-მინისტრმა, ტერეზა მეიმ აღნიშნა, რომ რუსეთთან კონტაქტების სრულად შეწყვეტა არ შეესაბამება დიდი ბრიტანეთის ინტერესებს.
