გერმანიის, საფრანგეთის, აშშ-ისა და დიდი ბრიტანეთის ლიდერები ყოფილი რუსი აგენტის, სერგეი სკრიპალისა და მისი ქალიშვილის მოწამვლის შესახებ ერთობლივ განცხადებას ავრცელებენ და მომხდარში ბრალს რუსეთს სდებენ.
„ჩვენ, საფრანგეთის, გერმანიის, აშშ-ისა და დიდი ბრიტანეთის ლიდერები ვგმობთ იმ თავდასხმას, რომელიც აგენტი სერგეი სკრიპალისა და მისი ქალიშვილის მიმართ განხორციელდა ბრიტანეთში 2018 წლის 4 მარტს“, - ნათქვამია განცხადებაში.
მათი შეფასებით, ეს იყო ქიმიკატების პირველი აგრესიული გამოყენება ევროპაში მეორე მსოფლიო ომის შემდეგ. ქვეყნების ლიდერები ამას დიდი ბრიტანეთის სუვერენიტეტის დარღვევად აფასებენ და მიიჩნევენ, რომ ამით ასევე დაირღვა ქიმიური იარაღის შესახებ კონვენცია და საერთაშორისო კანონმდებლობა. მათი შეფასებით, ეს ყველას უსაფრთხოებას უქმნის საფრთხეს.
ყოფილი რუსი აგენტისა და მისი ქალიშვილის მოწამვლის გამო დიდმა ბრიტანეთმა 23 რუსი დიპლომატი დაითხოვა. ბრიტანეთის პრემიერმა, ტერესა მეიმ მათ ქვეყნის დასატოვებლად ერთი კვირა მისცა და „არადეკლარირებული დაზვერვის ოფიცრები" უწოდა.
