სამუშაო ჯგუფი, რომელიც ქალთა პოლიტიკური მონაწილეობის გაზრდის შესახებ მუშაობს, განცხადებას ავრცელებს.
განცხადებაში ნათქვამია, რომ როგორც ცნობილია, საქართველოს პარლამენტი რამდენიმე დღეში განიხილავს 37,455 ამომრჩევლის საკანონმდებლო ინიციატივას, რომელიც საპარლამენტო და ადგილობრივი თვითმმართველობის არჩევნებზე, პარტიებსა და ბლოკებს დაავალდებულებს, რომ პარტიულ სიებში ყოველი მეორე განსხვავებული სქესის კანდიდატი წარადგინონ.
„ვრცელდება ინფორმაცია, რომ მმართველ პარტიაში განიხილება კანონპროექტის იმგვარი ცვლილება, რომ პროპორციულ სიებში ყოველი მესამე კანდიდატი იყოს განსხვავებული სქესის, ხოლო მაჟორიტარებს შორის ყოველი მეექვსე. კანონპროექტის ამგვარი ფორმით მიღების შემთხვევაში, ქალთა წარმომადგენლობა პარლამენტში გარანტირებულად მხოლოდ 15%-ით გაიზრდება, მაჟორიტარულ ოლქებში ქალი კანდიდატების გამარჯვების შემთხვევაში კი 23%-მდე.
გარანტირებული მინიმუმი იქნება არა მხოლოდ არსებული სტატუს კვოს ეკვივალენტი (დღეს საქართველოს პარლამენტის წევრთა 15 პროცენტია ქალი), ხოლო მაქსიმუმი 23 პროცენტით საგრძნობლად ჩამორჩება გაეროს და სხვა საერთაშორისო ორგანიზაციების მიერ რეკომენდირებულ ე.წ. კრიტიკული მასისთვის აუცილებელ 30-40 პროცენტს, "- ნათქვამია განცხადებაში.
სამუშაო ჯგუფში ამბობენ, რომ მსგავსი სახით კანონპროექტის ცვლილება ვერ უზრუნველყოფს ქალთა წარმომადგენლობის არსებით ზრდას.
პარლამენტში სამუშაო ჯგუფის მიერ წარდგენილი ინიციატივა ითვალისწინებს პროპორციულ სისტემაში ქალთა და მამაკაცთა თანაბარ წარმომადგენლობას, რაც დღეს არსებული შერეული სისტემის შემთხვევაში, მათი თქმით, ერთადერთი რეალური გზაა პარლამენტში ქალთა რაოდენობის გასაზრდელად, თუმცა ისიც მხოლოდ 25%-იან წარმომადგენლობას უზრუნველყოფს.
„მოვუწოდებთ პარლამენტს მხარი დაუჭიროს გენდერული კვოტირების შესახებ საკანონმდებლო ინიციატივას იმ სახით, როგორც ის ამომრჩევლებმა წარადგინეს პარლამენტში, რადგან შემოთავაზებული ალტერნატიული სახით კვოტირების შემოტანა ფორმალურ სახეს მიიღებს და ვერ მიუშვებს, როგორც ქალთა წარმომადგენლობის ზრდის ეფექტური და არსებითი მექანიზმი, "- ნათქვამია განცხადებაში.