ამჟამად, პაციენტს არც ნეიროქირურგიული და არც ოპერაციული ჩარევა არ სჭირდება. გამოსაკვლევად რჩება მხოლოდ თვალი, - ამის შესახებ იაშვილის სახელობის კლინიკის გადაუდებელი დეპარტამენტის უფროსმა ოთარ რუსაძემ ჟურნალისტებს განუცხადა.

მისივე განმარტებით, კლინიკაში შეყვანის დროს პაციენტი კონტაქტური იყო, თუმცა თვალისა და კისრის არეში დაზიანებები აღენიშნებოდა. ექიმის განმარტებით, მოზარდს კლინიკაში შესაბამისი გამოკვლევა ჩაუტარდა.

„ჩვენთან მოყვანისას ბავშვი კონტაქტური იყო. მხედველობა არ ჰქონდა, ანუ უჭირდა მზერა. ჩატარდა თავის და მუცლის ღრუს კომპიუტერული ტომოგრაფია. ჩვენი კლინიკური დიაგნოზი ამჟამად არის თავის ტვინის შერყევა. რამე ანატომიური პრობლემები თავის ტვინში არ აღენიშნება. მუცლის ღრუს ტომოგრაფიის დროს აღმოჩნდა, რომ აქვს რაღაც სითხოვანი. გაკეთდა კომპიუტერული ტომოგრაფია და ჩვენი კვლევებით დადასტურდა, რომ ეს არ არის ახალი წარმონაქმნი, რომელიც ჩვენ შემთხვევით აღმოვაჩინეთ კვლევების დროს. ამჟამად, პაციენტს არც ნეიროქირურგიული და არც ოპერაციული ჩარევა არ სჭირდება. გამოსაკვლევად რჩება მხოლოდ თვალი. მოვა სპეციალისტი, რომელიც შეაფასებს თვალის მდგომარეობას და გადაწყვეტს, სჭირდება ქირურგიული ჩარევა, თუ კონსერვატიული მკურნალობა. თვალზე სისხლნაჟღენთები აღენიშნება, ასევე სტრანგულაციური ხაზი კისერზე, გულმკერდის მარჯვენა მხარის ზედაპირზე სისხლნაჟღენთებია“, - განაცხადა რუსაძემ. 

-------------------------------------------------------------------------------------------

შინაგან საქმეთა სამინისტროს ინფორმაციით, არასრულწლოვნის მიმართ ძალადობის ბრალდებით თბილისში 1 პირი დააკავეს.

მოგვიანებით ცნობილი გახდა, რომ შემთხვევა ვაჟა-ფშაველას მე-7 კვარტალში, საცხოვრებელი კორპუსის ლიფტში მოხდა. „ინტერპრესნიუსთან" საუბრისას მოზარდის ახლობლები აცხადებენ, რომ არასრულწლოვანი სკოლიდან ბრუნდებოდა, ლიფტში მასთან ერთად ამჟამად უკვე ბრალდებულიც შევიდა, რომელიც იმავე სადარბაზოში ცხოვრობდა. 

ახლობლების თქმით, ბრალდებულმა ლიფტი სართულებს შუა გააჩერა და ბავშვს ცემა დაუწყო. შემდეგ თავი დაუჭირა და თვალები დაუზიანა, რის შემდეგაგან მოზარდმა მხედველობა დაკარგა.

მოზარდი ამ დროისთვის იაშვილის კლინიკაშია გადაყვანილი, მისი მდგომარეობა სტაბილურია. მას შესაბამისი გამოკვლევები ჩაუტარდება. 

მომხდარზე გამოძიება სსკ-ის 126-ე მუხლის მე-2 ნაწილის „დ ქვეპუნქტით მიმდინარეობს, რაც წინასწარი შეცნობით არასრულწლოვნის მიმართ ძალადობას გულისხმობს.