რუსეთის საგარეო საქმეთა სამინისტრო ჟენევის მოლაპარაკებების შესახებ განცხადებას ავრცელებს. მათი თქმით, საქართველო ჟენევის მოლაპარაკებისას შეეცადა, რუსეთისთვის დაეკისრებინა პასუხისმგებლობა თავის უუნარობაზე, ამასთან საქართველომ უნდა დაიწყოს დიალოგი აფხაზეთსა და სამხრეთ ოსეთთან და გააუქმოს კანონი „ოკუპირებული ტერიტორიების შესახებ“.
„საქართველო კვლავ შეეცადა, რუსეთისთვის დაეკისრებინა პასუხისმგებლობა საკუთარ უუნარობაზე, რადგან ვერ არეგულირებს ურთიერთობას სოხუმსა და ცხინვალთან. ჩვენი მხრიდან ხაზი გაესვა ქართული მხარის არაპროდუქტიულ მცდელობებს, ჟენევის შეხვედრებს იყენებენ თავიანთი იდეოლოგიური კლიშეებისთვის.
საქართველო სერიოზულად უნდა დაფიქრდეს მეზობლებთან ნდობის აღდგენაზე, დაიწყოს ჟენევაში პირდაპირი დიალოგი აფხაზეთსა და სამხრეთ ოსეთთან. მან უარი უნდა თქვას სხვა ქვეყნების წაქეზებაზე მათი მცხოვრებლების სავიზო ბლოკადასთან დაკავშირებით. საქართველომ უნდა გააუქმოს კანონი „ოკუპირებული ტერიტორიების შესახებ“, შეწყვიტოს ამ რესპუბლიკების კულტურულ-ჰუმანიტარული ღონისძიებების ჩაშლა“, - ნათქვამია რუსეთის საგარეო საქმეთა სამინისტროს განცხადებაში.
განცხადებაში აღნიშნულია, რომ რუსეთის, აფხაზეთისა და სამხრეთ ოსეთის დელეგაციებმა გამოხატეს შეშფოთება საქართველოს NATO-სთან სამხედრო თანამშრომლობასთან დაკავშირებით. რადგან არ არსებობს გარანტია, რომ საქართველო დასავლური იარაღით კვლავაც არ მიმართავს სამხედრო მიდგომას თავის მეზობლებთან.
27-28 მარტს გაიმართა ჟენევის საერთაშორისო მოლაპარაკებების 43-ე რაუნდი, რომლის ფარგლებშიც განხილვის მთავარ საგანს წარმოადგენდა არჩილ ტატუნაშვილის სიცოცხლის უკანონო ხელყოფა და საქართველოს ოკუპირებულ რეგიონებში უსაფრთხოების საერთაშორისო მექანიზმების შექმნა, ცეცხლის შეწყვეტის შეთანხმების სრული დაცვით.