სახელმწიფო უსაფრთხოების სამსახურმა პარლამენტს 2017 წლის ანგარიში წარუდგინა. ანგარიშის მიხედვით, საქართველოს უსაფრთხოების ერთ-ერთი მნიშვნელოვანი გამოწვევაა „ჰიბრიდული ომი“, რომლის ფარგლებშიც უცხო ქვეყნის სადაზვერვო სამსახურები ცდილობენ, ქვეყანაში გაავრცელონ ანტიდასავლური პროპაგანდა, შელახონ საქართველოს იმიჯი და შექმნან დესტაბილიზაციის კერები ეთნიკურ და რელიგიურ ნიადაგზე.
„კონტრდაზვერვითი საქმიანობის შედეგად მოპოვებული ინფორმაციის ანალიზი ცხადყოფს, რომ საქართველოში უცხო ქვეყნების სპეცსამსახურების ძირითადი ამოცანებია: ქართულ საზოგადოებაში ანტიდასავლური განწყობის გაღვივება; საერთაშორისო დონეზე საქართველოს, როგორც საიმედო პარტნიორის იმიჯის შელახვა; საზოგადოებაში უნდობლობის, გაურკვევლობის, უიმედობისა და ნიჰილიზმის გაჩენა; ეთნიკურ და რელიგიურ ნიადაგზე დესტაბილიზაციის კერების შექმნა, რათა ქვეყანაში განვითარდეს დეზინტეგრაციული პროცესები და მოხდეს ქართული საზოგადოების პოლარიზაცია.“ - წერია ანგარიშში.
ანგარიშის მიხედვით, საზოგადოებრივ აზრზე ზემოქმედებისა და დეზინფორმაციის გავრცელებისთვის უცხო ქვეყნების სპეცსამსახურების მხრიდან შეიმჩნევა ექსპერტული სამეცნიერო-კვლევითი ცენტრებისა და სააგენტოების შექმნის მცდელობა, კონკრეტული თემების დამუშავებისა და საზოგადოებისთვის საკუთარი ინტერესების შესაბამისად მიწოდების მიზნით.
„საქართველოსა და უცხო ქვეყნებში იდენტიფიცირებულნი არიან პირები, რომლებიც ქვეყნის უსაფრთხოებისა და ტერიტორიული მთლიანობის ხელყოფის იდეის პროპაგანდას ეწევიან. მათი მხრიდან მომდინარე საფრთხეების განეიტრალების მიზნით, გატარდა შესაბამისი ღონისძიებები.“ - ნათქვამია სუსის ანგარიშში.
სუსის ანგარიშის მიხედვით, უცხო ქვეყნის სადაზვერვო სამსახურები სხვადასხვა საქმიანობის ფარგლებში ასევე ცდილობენ, შეაღწიონ ხელისუფლების ორგანოებსა და ქვეყნის უსაფრთხოების სტრუქტურებში, მოიპოვონ მათთვის სასურველი ინფორმაცია და გააფართოონ ჯაშუშური ქსელი.
„უცხო ქვეყნების სპეცსამსახურები განსაკუთრებულ ძალისხმევას იჩენენ სახელმწიფო საიდუმლოებას მიკუთვნებული ინფორმაციის მოსაპოვებლად. სადაზვერვო სამსახურები მათ ხელთ არსებული საშუალებების გამოყენებით ცდილობენ, შეიქმნან ინფორმაციის მოპოვების არხები სახელმწიფო სტრუქტურებში, კომერციულ, სამეცნიერო, საგანმანათლებლო დაწესებულებებსა და სტრატეგიული მნიშვნელობის ობიექტებში.“ - წერს სუსი.
სუსის ანგარიშის მიხედვით, საანგარიშო პერიოდში კონტრდაზვერვის დეპარტამენტში გამოძიება დაიწყო სისხლის სამართლის 11 საქმეზე და ბრალდებულის სახით პასუხისგებაში მიცემულია 5 პირი.
