საქართველოს მთავრობის N2148 განკარგულებით, საქართველოს სამოციქულო ავტოკეფალურ მართლმადიდებელ ეკლესიას სოფელ იყალთოში, შუამთასა და ახალ შუამთაში 13 მიწის ნაკვეთით და მასზე არსებული შენობა-ნაგებობით სარგებლობის უფლება უსასყიდლოდ 49 წლით გადასცა.
განკარგულებაში აღნიშნულია, რომ მართლმადიდებელ ეკლესიას უძრავი ქონება უსასყიდლო უზუფრუქტის უფლებით გადაეცა (უზუფრუქტი - უძრავი ნივთის გადაცემა სარგებლობაში ისე, რომ უზუფრუქტუარი უფლებამოსილია, როგორც მესაკუთრემ გამოიყენოს ეს ნივთი, მაგრამ მესაკუთრისაგან განსხვავებით მას არ შეუძლია ნივთის გასხვისება, იპოთეკით დატვირთვა ან მემკვიდრეობით გადაცემა).
5 აპრილს გამოქვეყნებული განკარგულებით გაწერილია სარგებლობაში გადაცემის პირობები. კერძოდ, მართლმადიდებელი ეკლესია ვალდებულია, უზრუნველყოს:
- განკარგულებით გათვალისწინებულ უძრავ ქონებაზე არსებული ტურისტული ინფრასტრუქტურის შენარჩუნება და მოვლა-პატრონობა;
- უძრავი ქონებისა და მასზე არსებული ინფრასტრუქტურის ტურისტული მიზნით გამოყენებისა და ამავე მიზნებისათვის ქონების საჯარო ხელმისაწვდომობის უზრუნველყოფა, ასევე ამავე უძრავი ქონების განსავითარებლად სამეწარმეო-საინვესტიციო საქმიანობის ხელშეწყობა;
- ქონების განვითარების მიზნით, მესაკუთრის მიერ მითითებული შესაბამისი კომპეტენტური პირების/უწყებების დაშვება ამავე პუნქტით გათვალისწინებულ უძრავ ქონებაზე ინფრასტრუქტურული ან სხვა სახის სამუშაოების განხორციელებისათვის;
- ამავე პუნქტით გათვალისწინებულ უძრავ ქონებაზე სოფელ იყალთოში მდებარე ქვევრის სკოლა-სახელოსნოს (ე.წ. „ქვევრის სახლის“) ფუნქციონირების უზრუნველყოფა.
