საპარლამენტო უმრავლესობის დეპუტატმა გედევან ფოფხაძემ ჟურნალისტებს საქართველოში დაბრუნებისას აეროპორტში განუცხადა, რომ „ქართული ოცნების“ დატოვების თაობაზე გადაწყვეტილებას გუნდში პრობლემებზე საუბრის შემდგომ მიიღებს.
„ჩვენ დიდი ხნის ურთიერთობები გვაქვს და ერთი გუნდი ვართ. ამ გუნდიდან წასვლაც არ ნიშნავს, რომ ადამიანური ურთიერთობები დამთავრდება, რომელიც მართლაც ძალიან მყარია. შესაბამისად, ჩვენ შუამავლების საშუალებით საუბარი არ გვჭირდება, დავილაპარაკებთ. ყველა იმ საკითხს, რაც პრობლემურია, ამოვწურავთ და მერე მივიღებთ, ალბათ, იმ გადაწყვეტილებას, რაც მისაღებია. მე ჩემსას და სხვა – თავისას. ჩემთვის პრემიერის თხოვნა ნამდვილად სულერთი არ არის და ძალიან ანგარიშგასაწევია. დანარჩენი ერთმანეთში უნდა დავილაპარაკოთ“, – განაცხადა გედევან ფოფხაძემ.
ჟურნალისტის შეკითხვაზე, შესაძლოა, თუ არა უმრავლესობის რიგები მამუკა მდინარაძემ და ირაკლი კობახიძემ დატოვონ, გედევან ფოფხაძე პასუხობს, რომ ამის წინაპირობა არ არსებობს. მისივე თქმით, არის გარკვეული კომუნიკაციის პრობლემა, რომელიც შესაძლებელია, რომ გამოსწორდეს.
გედევან ფოფხაძემ 4 აპრილს განაცხადა, რომ საპარლამენტო უმრავლესობას ტოვებს.
გედევან ფოფხაძის განმარტებით, მისი გადაწყვეტილება საზოგადოებრივი მაუწყებლის სამეურვეო საბჭოს წევრად მმართველი გუნდის წევრების მხრიდან ნინია კაკაბაძის კანდიდატურის მხარდაჭერას უკავშირდება.
