რუსეთის სარდლობის ინფორმაციით, სირიის ქალაქ დუმაში „ჯაიშ ალ ისლამის“ მებრძოლებმა იარაღი დაყარეს. რუსული სამხედრო პოლიცია დასახლებაში დღეს შევიდა. ქალაქი 7 აპრილს, სავარაუდოდ, ქიმიური იარაღით დაბობმეს.

დუმა სირიის აღმოსავლეთ ღუტას რეგიონში, დედაქალაქ დამასკოსთან ახლოს მდებარეობს. ალყაში მოქცეულ დასახლებას 2012 წლის შემდეგ სირიელი მეამბოხეები აკონტროლებდნენ. სირიის სამთავრობო ჯარებმა რუსეთის დახმარებით აღმოსავლეთ ღუტას რეგიონზე იერიში წელს დაიწყეს. დუმა იყო რეგიონში უკანასკნელი დასახლება, რომლებსაც მეამბოხეები აკონტროლებდნენ.

აშშ-ის მტკიცებით, დუმას ასაღებად ასადის მთავრობამ ქიმიური იარაღი გამოიყენა. დაიღუპა 60-ზე მეტი ადამიანი, მინიმუმ 1000 კი დაშავდა. გაზით მოწამვლის სიმპოტმები ჰქონდათ დაშავებულებს მსოფლიო ჯანდაცვის ორგანიზაციის სპეციალისტების თქმითაც. თუმცა, თავად ასადი და რუსეთის ხელისუფლება ქიმიური იარაღის გამოყენებას უარყოფს.

ჯერჯერობით გაეროს უშიშროების საბჭოში ქვეყნები დამოუკიდებელი საგამოძიებო კომისიის შექმნაზე ვერ შეთანხმდნენ. ამერიკული ინიციატივები რუსეთმა დაბლოკა, რუსული კი პირიქით - აშშ-მა.

ამის გამო, 10-11 აპრილს, სირიის გარშემო ვითარება გამწვავდა. ხმელთაშუა ზღვაში ამერიკული, ბრიტანული, ფრანგული ფლოტისა და საჰაერო ძალების მობილიზება დაიწყო. აშშ-ის პრეზიდენტის დონალდ ტრამპის განცხადეიბთ, ბაშარ ალ-ასადი ქიმიური იარაღის გამოყენების გამო პასუხს აგებს და ამისთვის ამერიკას სამხედრო ინტერვენციის რამდენიმე გეგმა აქვს.

დონალდ ტრამპმა გუშინ ასევე უპასუხა ლიბანში რუსეთის ელჩის განცხადებას, რომ თუ აშშ სირიაზე სარაკეეტო იერიშს მიიტანდა, ისინი ჩამოყრიდნენ რაკეტებს. ტრამპის თქმით, დროა რუსეთი მოემზადოს, რადგან სირიისკენ რაკეტები გაფრინდებიან.

მობილიზაცია გამოაცხადა ისრაელის არმიამაც, რომელმაც კვირას ერთი საჰაერო იერიში სირიაზე უკვე მიიტანა, რასაც 7 ირანელი სამხედრო ემსხვერპლა.