ეროვნული ბანკის სტატისტიკური მონაცემების თანახმად, საქართველოში არსებულმა კომერციულმა ბანკებმა 2017 წელს იურიდულ პირებზე სესხის სახით 7 425 971 000 ლარი გასცეს. საქმიანობის სფეროს მიხედვით ყველაზე დიდი თანხა სავაჭრო (2 320 127 000 ლარი), ფინანსურ შუამავლობისა (2 284 409 000 ლარი) და სამრეწველო (1 455 863 000 ლარი) სექტორებზე გაიცა.
რაც შეეხება სხვა სფეროებს, სოფლის მეურნეობის, მეტყევეობისა და თევზჭერის სექტორმა კომერციული ბანკებისგან სესხის სახით 115 267 000 ლარი მიიღო, სამშენებლო სექტორმა - 456 127 000 ლარი, სასტუმროებისა და რესტორნების სექტორმა - 86 363 000 ლარი.
ტრანსპორტისა და კავშირგაბმულობის მიმართულებით მომუშავე იურიდიულმა პირებმა 2017 წელს კომერციულიული ბანკებისგან სესხის სახით 164 605 000 ლარი მიიღეს, კვლევებსა და უძრავ ქონებაზე მომუშავე იურიდიულმა პირებმა - 53 658 000 ლარი.
საგანმანათლებლო სექტორში მომუშავე იურიდიულმა პირებმა კომერციული ბანკებისგან 2017 წელს 29 151 000 ლარი ისესხეს, ხოლო ჯანდაცვის და სოციალური მომსახურების სექტორში მყოფმა იურიდიულმა პირებმა - 212 422 000 ლარი. მომსახურების სხვა სახეებზე მომუშავე პირებმა ბანკებისგან 247 936 000 ლარი მიიღეს.
რაც შეეხება საპროცენტო განაკვეთს, მისი მაჩვენებელი საქმიანობის სფეროებისა და თვეების მიხედვით განსხვავებულია. ის 7,6-დან 13,5%-მდე მერყეობს. წლის განმავლობაში ყველაზე დაბალი საპროცენტო განაკვეთით ფინანსურ შუამავლობაზე მომუშავე იურიდიულმა პირებმა ისარგებლეს. მათ სესხი საშუალოდ 7,6-9 პროცენტში აიღეს.
საგანმანათლებლო სექტორში მყოფ იურიდიულ პირებს სესხი 10-13 პროცენტში ჰქონდათ, ჯანდაცვისა და სოციალური მომსახურების სფეროში მყოფ პირებს - 11-13%-ში, ხოლო მომსახურების სხვა სექტორებში მყოფ იურიდიულ პირებს - 10-12%-ში.
გუშინ ახალგაზრდა ფერმერებთან და მეწარმეებთან გამართულ შეხვედრაზე პრემიერ-მინისტრმა გიორგი კვირიკაშვილმა მთავრობის ახალი პროექტის შესახებ ისაუბრა, რომელიც სახელმწიფოს მიერ მეწარმეების თანადაფინანსებას გულისხმობს.
პრემიერმა ახალგაზრდა მეწარმეებს „სასტარტო კაპიტალით უზრუნველყოფის რეფორმის“ ინიციატივა გააცნო
„საუბარია იმაზე, რომ თანამონაწილეობა, ანუ არსებული კაპიტალი კომპანიას არ აძლევს საშუალებას, აიღოს ის საბანკო დაფინანსება, რომელიც მას საშუალებას მისცემს, განახორციელოს ესა თუ ის პროექტი. ასეთ შემთხვევაში, სახელმწიფო კონკრეტული პრიორიტეტებით ჩაერევა და გააკეთებს ინექციას კაპიტალში იმისათვის, რომ პროექტის დაფინანსება შესაძლებელი გახადოს კომერციული საბანკო სექტორის მიერ“, - განაცხადა პრემიერმა.
მეწარმეებისა და ბიზნესისთვის ხელისშემშლელ ფაქტორებზე გუშინ ფინანსთა მინისტრმა, მამუკა ბახტაძემაც ისაუბრა. მისი თქმით, „მაღალპროცენტიანი სესხები საბანკო სისტემაში აფერხებს მეწარმეობისა და ბიზნესის განვითარებას. საქართველოს საბანკო სისტემა უნდა იყოს არა ეკონომიკის განვითარების მუხრუჭი, არამედ მისი მამოძრავებელი ძალა. თუმცა, სამწუხაროდ, ჩვენს ქვეყანაში მივიღეთ რეალობა, სადაც ბანკები არ ასრულებენ ამ მამოძრავებელი ძალის ფუნქციას“, - განაცხადა მამუკა ბახტაძემ.
ფინანსთა მინისტრი: საბანკო სისტემაში მაღალპროცენტიანი სესხები აფერხებს ბიზნესის განვითარებას