პრეზიდენტმა ბარნოვის ქუჩაზე მოკლული ქალის საქმეზე ბრალდებული კაცის შეწყალებასთან დაკავშირებით განმარტება გააკეთა და შეწყალების მოტივებზე ისაუბრა.
პრესკონფერენციაზე პრეზიდენტმა აღნიშნა, რომ ვეფხვია ბაქრაძემ 2014 წელს ცოლის მიმართ ჩაიდინა ძალადობრივი დანაშაული, თუმცა ის მხოლოდ 4 თვის შემდეგ ავტოსაგზაო შემთხვევის გამო დააკავეს და ორივე დანაშაულისთვის წარუდგინეს ბრალი (ოჯახის წევრზე ძალადობის მუხლით და ავარიის გამო)
„ლიბერალი” დაუკავშირდა შინაგან საქმეთა სამინისტროს შეკითხვით, თუ რატომ არ დააკავეს დაუყოვნებლივ 2014 წელს ოჯახის წევრზე (მეუღლეზე) ძალადობის შემდეგ ვეფხვია ბაქრაძე და აღიძრა თუ არა მაშინვე ოჯახის წევრზე ძალადობის მუხლით საქმე.
შსს-ს ცნობით, ცოლზე განხორციელებული ძალადობის შემდეგ ვეფხვია ბაქრაძე მიმალვაში იმყოფებოდა და ის ავტოსაგზაო შემთხვევის შემდეგ დააკავეს და ბრალი ორივე საქმეზე წარუდგინეს.
2015 წელს ვ.ბ სასამართლომ ოჯახში ძალადობის მოტივით ჩადენილი დანაშაულისთვის დამნაშავედ ცნო. ის სასჯელს საქართველოს სისხლის სამართლის კოდექსის 11 პრიმა 117-ე და 276-ე მუხლებით გათვალისწინებული დანაშაულის ჩადენისთვის იხდიდა. ვ.ბ. პრეზიდენტმა შეიწყალა. მას სასჯელი გაუნახევრდა და საპატიმრო დაწესებულება ვადაზე ადრე 2017 წლის 25 მაისს დატოვა.
