მწვანე კონცხზე მდებარე ევკალიპტის ხის ტენდერში გამარჯვების შემდეგ „დმანისის გადარჩენის ფონდი“, რომელიც რამდენიმე პოლიტიკურ პარტიას აერთიანებს, ხელშეკრულების იმ პუნქტის გასაჩივრებს გეგმავს, რომლის მიხედვითაც, ტენდერში გამარჯვებული სუბიექტი ვალდებულია, ხე გადარგოს. ამის შესახებ დღეს გამართულ ბრიფინგზე ისაუბრეს ფონდის წარმომადგენლებმა.
ხელშეკრულება, ფინანსთა სამინისტორს მომსახურების სააგენტოსა და „დმანისის გადარჩენის ფონდს“ შორის უკვე დადებულია. აღნიშნული პირობის შესახებ ტენდერში გამარჯვებული მხარე ინფორმირებული იყო, თუმცა ფონდში განმარტავენ, რომ ამ პირობაზე დათანხმების გარეშე ხელშეკრულების დადების საშუალება არ ჰქონდათ.
„დმანისის გადარჩენის ფონდი“ სამართლებრივი დავის წამოწყებას მხარეებს შორის მიღება-ჩაბარების აქტი გაფორმების შემდეგ აპირებს.
„დმანისის გადარჩენის ფონდმა“, რომელიც ოპოზიციური პარტიებითაა დაკომპლექტებული, აუქციონში მოგებული ევკალიპტის ხე 20 020 ლარად შეიძინა. ფინანსთა სამინისტროს მომსახურების სააგენტოს მიერ აუქციონის წესით გატანილი ევკალიპტის ხის საწყისი ფასი 7000 ლარი იყო.