ჩრდილო კორეის ლიდერმა, კიმ ჩენ ინმა სამხრეთ კორეაში სამიტის დასრულებამდე, წვეულების შემდეგ განაცხადა, რომ ორ კორეას შორის ფორმალური ომი დასრულებულია. მისი თქმით, დიდი დრო დასჭირდა ქვეყნების წარმომადგენლებს, რომ ერთმანეთს შეხვედროდნენ.
„ჩრდილო და სამხრეთ კორეა ერთი და იგივე ხალხია, ერთი და იმავე სისხლით, არ შეიძლება, ისინი ასე გაყოფილნი იყვნენ ერთმანეთისგან“, - განაცხდა ჩრდილო კორეის ლიდერმა, კიმ ჩენ ინმა.
სამიტის შემდეგ წვეულებაზე კიმ ჩენ ინმა ასევე განაცხადა, რომ მათ უნდა შეინარჩუნონ მშვიდობა და დაიწყოს „მეგობრობის ახალი ერა“, რათა დაძლიონ კორეის ნახევარკუნძულზე არსებული გამოწვევები.
მისი თქმით, ის არის მზად, შეასრულოს თავისი ვალდებულება, რათა წვლილი შეიტანოს „მსოფლიო მშვიდობის მშენებლობაში“. ჩრდილო კორეის ლიდერი აცხადებს, რომ „დღეიდან იწყება ახალი ისტორია“.
„რა თქმა უნდა, შეიძლება იყოს უთანხმოებაც, იმედგაცურებაც, მაგრამ გამარჯვება ვერ მოვა ტკივილის გარეშე“, - დასძენს კიმ ჩენ ინი.
სამხრეთ კორეის პრეზიდენტმა, მუნმა მადლობა გადაუხადა კიმ ჩენ ინს სიმამაცისა და გაბედული ნაბიჯისთვის.
„შვიდი ათწლეულის განმავლობაში ჩვენ არ გვქონდა შესაძლებლობა, გვესაუბრა. ამიტომ ჩვენ დღეს მთელი დღეა, ვსაუბრობთ“, - თქვა მუნ ჯე ინმა.
ჩრდილო კორეის ლიდერმა, კიმ ჩენ ინმა, სამხრეთ კორეა უკვე დატოვა.
ლიდერებმა ხელი მოაწერეს დეკლარაციას, რომლის მიხედვითაც, ერთმანეთის მიმართ აგრესიულ ქმედებებს შეწყვეტენ და ასევე, შეთანხმდნენ ბირთვულ განიარაღებაზე.
როგორც დეკლარაციაშია ნათქვამი, ისინი მიზნად ისახავენ კორეის ნახევრაკუნძულის ბირთვული იარაღისგან გათავისუფლებას. ათწლეულების განმავლობაში პირველი შეხვედრის შემდეგ მხარეებმა განაცხადეს, რომ შეეცდებიან, კორეის ნახევარკუნძლზე სტაბილური და მშვიდობიანი ურთიერთობა დაამყარონ. ასევე შეთანხმდნენ, რომ კვლავ განაგრძობენ აქტიურ დიალოგს და საბოლოოდ მშვიდობის ხელშეკრულებას გააფორმებენ.
Kim Jong Un waves goodbye at the #InterKoreanSummit (accompanied, of course, by his now-famous jogging bodyguards) https://t.co/DQQJUt03lk pic.twitter.com/1LmK6pUN1c
— CNN (@CNN) April 27, 2018