„ჩვენთან არანაირი საუბარი და მოლაპარაკება არ ყოფილა, რა აძლევს კალაძეს ამის თქმის საფუძველს, ნამდვილად არ ვიცი, ვერ ვხვდები. თუ რაიმე ახალი ხერხი აქვთ მოგონებული და უპილოტოდ შეუძლიათ, რომ ატარონ მატარებელი, არ ვიცი", - ამის შესახებ „ლიბერალს" მემანქანეთა დამოუკიდებელი პროფკავშირის, „ერთობა 2013-ის" გამგეობის თავმჯდომარემ, რატი კაპანაძემ განუცხადა.

მისი თქმით, თუ მემანქანეებს მოთხოვნებს არ დაუკმაყოფილებენ, პოზიციების დათმობას არ აპირებენ.

თბილისის მერმა, კახა კალაძემ, ჟურნალისტებთან განაცხადა, რომ მეტრო იმუშავებს და არ გაჩერდება, მისი თქმით, არსებული ეკონომიკური მდგომარეობიდან გამომდინარე, თანხის მატებაზე საუბარი შეუძლებელია.

„არანაირი პარალიზება არ მოხდება, მეტრო იმუშავებს. ჩვენ ყველაფერს გავაკეთებთ იმისთვის, რომ მეტრო არ გაჩერდეს. გაფიცვა მათი კონსტიტუციური უფლებაა. უბრალოდ, ადამიანურად ასეთი მიდგომები გულდასაწყვეტია და ძალიან ცუდი", - აცხადებს კალაძე.

ხუთშაბათს, 3 მაისს დილის 06:00-დან თბილისის მეტროპოლიტენის შემადგენლობის 100% გაიფიცება. 

მემანქანეებიის მთავარი მოთხოვნაა, ანაზღაურება გაიზარდოს 45%-ის ოდენობით. მემანქანეების თქმით, ისინი საათობრივად 7 ლარს იღებენ, მათ სურთ, რომ ანაზღაურება 10 ლარამდე გაიზარდოს.