ზემო ოსიაური-ჩუმათელეთის მთავარი მაგისტრალის მშენებლობაზე დასაქმებული 80-მდე მუშა მესამე დღეა, გაფიცულია. 

როგორც მშენებლობაზე დასაქმებულმა გოჩა კორკოტაძემ „ლიბერალს“ უთხრა, ისინი გუშინ შეხვდნენ კომპანიის წარმომადგენელს, მაგრამ, მისივე თქმით, შეხვედრა უშედეგო  იყო.

ოსიაური-ჩუმათელეთის მთავარი მაგისტრალის მშენებლობაზე დასაქმებულებს გუშინ პროფკავშირების წარმომადგენლებიც შეხვდენენ. 

გაფიცვის მიზეზი დაბალი ანაზღაურება და არასათანადო შრომითი პირობებია. 

გოჩა კორკოტაძე ამბობს, რომ მძღოლებისთვის ანაზღაურება დღეში 18-20 ლარია, მუშებისთვის კი - 16-18 ლარი. გარდა ამისა, მისი თქმით, მუშებს არ აქვთ დასვენების დღე.  იმ შემთხვევაში, თუკი დაისვენებენ, მათ ხელფასიდან აკლდებათ თანხა; მუშაობენ დღეში 10 საათის განმავლობაში და არ აქვთ სამედიცინო დაზღვევა.

გოჩა კორკოტაძის თქმით, გაფიცული მუშები მოითხოვენ ანაზღაურების მომატებას და თვეში 4 დღე დასვენებას.

ზემო ოსიაური-ჩუმათელეთის მთავარ მაგისტრალს ჩინური კომპანია შპს კორპორაცია „სინოჰიდროს“ ფილიალი საქართველოში აშენებს. სამშენებლო სამუშაოები შარშან, დეკემბერში დაიწყო.